print edition കഴുത്തുഞെരിച്ച്‌ കേന്ദ്രം; ഓരോ വർഷവും പദ്ധതിവിഹിതം വെട്ടിച്ചുരുക്കി മോദി സർക്കാർ

തൊഴിലുറപ്പ്‌ പദ്ധതിയെ കഴുത്തുഞെരിച്ച്‌ കൊല്ലുകയാണ്‌ മോദി സർക്കാർ. 2020–21 കാലയളവിൽ പദ്ധതിക്ക്‌ 1.10 ലക്ഷം കോടി രൂപ ബജറ്റിൽ നീക്കിവെച്ചിരുന്നു. എന്നാൽ കഴിഞ്ഞ രണ്ട്‌ ബജറ്റുകളിലായി 86000 കോടി രൂപ മാത്രമാണ്‌ അനുവദിക്കുന്നത്‌. ഓരോ വർഷവും പദ്ധതിവിഹിതം വെട്ടിച്ചുരുക്കുകയാണ്‌ മോദി സർക്കാർ.

ബജറ്റിൽ ആവശ്യത്തിന്‌ വിഹിതമില്ലാത്തതിനാൽ എല്ലാ സംസ്ഥാനങ്ങളിലും തൊഴിലുറപ്പ്‌ പദ്ധതി പ്രതിസന്ധിയിലാണ്‌. ആവശ്യത്തിന്‌ തൊഴിൽദിനങ്ങൾ ലഭ്യമാക്കാനോ, മുടക്കമില്ലാതെ വേതനം നൽകാനോ കഴിയുന്നില്ല. വർഷം 100 തൊഴിൽദിനങ്ങളാണ്‌ പദ്ധതിപ്രകാരം ഉറപ്പാക്കേണ്ടത്‌. എന്നാൽ 40–45 തൊഴിൽ ദിനങ്ങൾ മാത്രമാണ്‌ ശരാശരി ലഭിക്കുന്നത്‌. വേതന കുടിശ്ശികയാകട്ടെ പലപ്പോഴും മാസങ്ങൾ വൈകുന്നു.

2014ൽ അധികാരത്തിൽവന്നതുമുതൽ തൊഴിലുറപ്പ്‌ പദ്ധതിയുമായി മുന്നോട്ടുപോകാൻ കേന്ദ്രസർക്കാരിന്‌ താൽപ്പര്യമുണ്ടായിരുന്നില്ല. മുൻസർക്കാരുകളുടെ ഭരണപരാജയത്തിന്റെ പ്രത്യക്ഷ ഉദാഹരണമായി പദ്ധതി നിലകൊള്ളുമെന്നാണ്‌ പ്രധാനമന്ത്രിയായശേഷം മോദി പ്രഖ്യാപിച്ചത്‌. കോടിക്കണക്കിന്‌ ദരിദ്രജനവിഭാഗങ്ങൾക്ക്‌ ജീവിതമാർഗമായ പദ്ധതിയെ ഫണ്ടുകൾ വെട്ടിക്കുറച്ചുംമറ്റും പരമാവധി ദുർബലമാക്കി. 2020–21 കാലയളവിൽ 11.2 കോടി പേരായിരുന്നു പദ്ധതിയുടെ ഗുണഭോക്താക്കൾ. 2024–25ൽ ഇത്‌ 7.9 കോടിയായി. 2023–24ൽ 8760 കോടിയായിരുന്ന കുടിശ്ശിക 2024–25ൽ 33539 കോടിയിലേക്ക്‌ കുതിച്ചു. കഴിഞ്ഞ 11 വർഷമായി വേതനത്തിൽ വർധനയുമില്ല. അതേസമയം, കോവിഡ്‌ കാലത്ത്‌ സർക്കാരിന്‌ പിടിവള്ളിയായത്‌ തൊഴിലുറപ്പ്‌ പദ്ധതിയാണ്‌. അടച്ചുപൂട്ടലിനെ തുടർന്ന്‌ നഗരങ്ങളിൽനിന്ന്‌ കൂട്ടമായി ഗ്രാമങ്ങളിലേക്ക്‌ പലായനം ചെയ്‌തവർക്ക്‌ വരുമാനം ഉറപ്പിക്കാൻ പദ്ധതി സഹായിച്ചു.