print edition തൊഴിലുറപ്പുനൽകിയത്‌ ഇടതുപക്ഷം

ഇന്ത്യൻ ഗ്രാമങ്ങളിലെ കോടിക്കണക്കിന്‌ ദരിദ്ര ജനവിഭാഗങ്ങൾക്ക്‌ ആശ്വാസം പകരുന്ന തൊഴിലുറപ്പ്‌ പദ്ധതി യാഥാർഥ്യമാക്കിയതിൽ ഇടതുപക്ഷ പാർടികളുടെ പങ്ക്‌ നിർണായകം. ഇടതുപക്ഷ പിന്തുണയോടെ പൊതുമിനിമം പരിപാടിയുടെ അടിസ്ഥാനത്തിൽ 2004ൽ അധികാരത്തിൽവന്ന ഒന്നാം യുപിഎ സർക്കാരാണ്‌ പദ്ധതി കൊണ്ടുവന്നത്‌.

നഗര–ഗ്രാമ വ്യത്യാസമില്ലാതെ ദരിദ്ര– ഇടത്തരം ജനവിഭാഗങ്ങൾക്ക്‌ പൊതുപ്രവൃത്തികളുടെ ഭാഗമായി വർഷം നൂറ്‌ തൊഴിൽ ദിനങ്ങൾ ഉറപ്പാക്കുന്ന പദ്ധതി പൊതുമിനിമം പരിപാടിയുടെ പ്രധാന അജൻഡകളിലൊന്നായിരുന്നു. എന്നാൽ, കോൺഗ്രസിലെ വലതുപക്ഷ സാമ്പത്തിക നയാനുകൂലികൾ തൊഴിലുറപ്പ്‌ പദ്ധതിയെ ശക്തമായി എതിർത്തു.

പദ്ധതി ഖജനാവിന്‌ വലിയ ഭാരമാകുമെന്നായിരുന്നു വാദം. എന്നാൽ, യുപിഎ– ഇടതുപക്ഷ ഏകോപനസമിതിയിൽ സിപിഐ എം ഉൾപ്പെടെയുള്ള ഇടതുപക്ഷ പാർടികൾ പദ്ധതിക്കായി സമർദം തുടർന്നു. ഒടുവിൽ 2005 ആഗസ്‌തിൽ ഭാഗികമായെങ്കിലും പദ്ധതി യാഥാർഥ്യമായി.