കെഎസ‌്ആർടിസി ഇലക്ട്രിക‌് ബസ‌് ഇന്ന‌് നിരത്തിൽ

തിരുവനന്തപുരം > കെഎസ‌്ആർടിസിയുടെ ആദ്യ ഇലക്ട്രിക‌് ബസ‌് തിങ്കളാഴ‌്ച തലസ്ഥാനവീഥിയിൽ. കെഎസ്​ആർടിസി പരീക്ഷണാടിസ്ഥാനത്തി​ൽ നിരത്തിലിറക്കുന്ന  ഇലക്ട്രിക‌് ബസ‌് തിങ്കൾ മുതലുള്ള അഞ്ചുദിവസം തിരുവനന്തപുരം ജില്ലയിലും തുടർന്നുള്ള അഞ്ചുദിവസംവീതം കൊച്ചിയിലും കോഴിക്കോട്ടും സർവീസ‌് നടത്തും.

തിങ്കളാഴ‌്ച പകൽ 11ന‌് തിരുവനന്തപുരം കെഎസ‌്ആർടിസി തമ്പാനൂർ സെൻട്രൽ ബസ‌്‌ സ്റ്റാൻഡിൽ മന്ത്രി എ കെ ശശീന്ദ്രൻ ഫ‌്ളാഗ‌് ഓഫ‌് ചെയ്യും.   മികച്ച പൊതുഗതാഗതസൗകര്യം ലക്ഷ്യമിട്ടും അന്തരീക്ഷമലിനീകരണം കുറയ‌്ക്കുന്നതിന്റെയും ഭാഗമായാണ‌് ഇലക്ട്രിക‌് ബസ‌്. വൈദ്യുതി ഉപയോഗിച്ച‌്  ചാർ‌ജ‌് ചെയ്യുന്ന ബാറ്ററിയാണ‌് ഇലക്ട്രിക‌് ബസിന്റെ ഇന്ധനം.   ഒരു യൂണിറ്റ്​ വൈദ്യുതിയിൽ ഒരു കിലോമീറ്റർ സർവീസ‌് നടത്താം. ബസ്​ പൂർണമായി ചാർജ‌്​ ചെയ്യാൻ​ 4 മുതൽ 5 മണിക്കൂർ വരെ വേണം. ഒരു തവണ ചാർജ‌്​ ചെയ്​താൽ 350 കിലോ മീറ്റർ ഒാടാം. എന്നാൽ, 300 കിലോമീറ്ററാണ്​ റൂട്ട്​ നിശ്ചയിച്ചിരിക്കുന്നത്.തിരുവനന്തപുരം, കോഴിക്കാട‌്, കൊച്ചി എന്നിവിടങ്ങളിൽ ഇലക്​ട്രിക്​ ബസ്​ ചാർജിങ‌് യൂണിറ്റുകൾ തയ്യാറാക്കും.
നിലവിലെ എസി ബസിന്റെ നിരക്കാണ്​ ഇലക്​ട്രിക്​ ബസിനും. ഒരു കിലോ മീറ്ററിന്​ ഇരുപത്​ രൂപ. തുടർന്നുള്ള ഒരോ കിലോമീറ്ററിനും ഒന്നര രൂപവീതവും.  മണിക്കൂറിൽ 120 കിലോമീറ്ററാണ്​  വേഗതയെങ്കിലും ഗതാഗത നിയമം അനുസരിച്ച‌് 80 കിലോമീറ്റർ വേഗതയേ കേരളത്തി​ലുണ്ടാകൂ. പരീക്ഷണ ഒാട്ടത്തിന‌് ഡ്രൈവർ സഹിതം ബസ‌് കമ്പനി നൽകും. വൈദ്യുതിയും  കണ്ടക്ടറെയും കെഎസ‌്ആർടിസി ഏർപ്പെടുത്തണം. ബസിന്​ 2.5 കോടി രൂപയാണ്​ ചെലവ്​. ഘട്ടംഘട്ടമായി 300 ഇലക്​ട്രിക്​ ബസുകളാണ് വാടക കരാർ വ്യവസ്ഥയിൽ സംസ്ഥാനത്ത‌് ​ നിരത്തിലിറക്കാൻ  ഉദ്ദേശിക്കുന്നത്​. നിലവിൽ ഹിമാചൽ ​പ്രദേശ്​, തെലങ്കാന, കർണാടകം, ഗോവ, മഹാരാഷ്ട്ര സംസ്ഥാനങ്ങളിൽ​ ഇലക്ട്രിക‌്‌ ബസുണ്ട‌്​. കേന്ദ്ര സബ്​സിഡിയോടെയാണിത്​.