കളങ്കാവൽ വിശേഷങ്ങളുമായി ജിതിൻ കെ ജോസ്‌

ഒരു ഇടവേളയ്‌ക്കുശേഷം വീണ്ടുമൊരു മമ്മൂട്ടിച്ചിത്രം തിയറ്ററിൽ എത്തുകയാണ്‌– കളങ്കാവൽ. ജിതിൻ കെ ജോസ്‌ എന്ന സംവിധായകൻകൂടി ഇതിനൊപ്പം മലയാളത്തിൽ എത്തുന്നു. മമ്മൂട്ടി കമ്പനി നിർമിക്കുന്ന ചിത്രത്തിൽ ആദ്യമായി മമ്മൂട്ടി–വിനായകൻ കൂട്ടുകെട്ടും സ്‌ക്രിനിലെത്തും. ‘ഭ്രമയുഗ’ത്തിലൂടെ സംസ്ഥാന ചലച്ചിത്രപുരസ്‌കാര നിറവിൽ നിൽക്കുന്ന മമ്മൂട്ടിയൂ‍ടെ നാലരപ്പതിറ്റാണ്ട്‌ നീണ്ട അഭിനയജീവിതത്തിൽ പുതുമ നിറഞ്ഞൊരു തിരനടനമാകുമെന്ന്‌ പ്രതീക്ഷിക്കുന്ന സിനിമയാണ്‌. ഒപ്പം വിനായകൻ എന്ന നടന്റെ പകർന്നാട്ടവും. കളങ്കാവലിനെക്കുറിച്ച്‌ സംവിധായകൻ ജിതിൻ കെ ജോസ്‌ സംസാരിക്കുന്നു.

സംഭവങ്ങൾ ഓർമ വരാം

നമ്മുടെ നാട്ടിലും പ്രദേശത്തും നടക്കുന്ന യഥാർഥ സംഭവങ്ങളിൽനിന്ന് പ്രചോദനംകൊണ്ട് ഒരുക്കിയിട്ടുള്ള സിനിമയാണ് കളങ്കാവൽ. എന്നാൽ അയഥാർഥ സംഭവങ്ങളുടെ ഡോക്യുമെന്റേഷനല്ല. ഫിക്‌ഷൻ സ്വഭാവത്തിലുള്ള ക്രൈം ഡ്രാമയാണ്. കുറെ യഥാർഥ സംഭവങ്ങളിൽനിന്നുള്ള നമ്മുടെ അനുമാനങ്ങൾ ചേർത്താണ് സിനിമയാക്കിയിരിക്കുന്നത്. എന്നാൽ, ഇതൊരു ഫിക്‌ഷനാണ്‌. കുറ്റകൃത്യങ്ങൾ ചെയ്യുന്ന വ്യക്തികളും അവരുടെ കുറ്റകൃത്യങ്ങളെക്കുറിച്ചുള്ള സൂചനകളും സിനിമയിലുണ്ട്. സിനിമ കാണുമ്പോൾ പ്രേക്ഷകർ കണ്ടിട്ടും കേട്ടിട്ടുമുള്ള യഥാർഥ സംഭവങ്ങൾ ഓർമയിലേക്ക് വന്നേക്കാം. എന്നാൽ, ഈ കുറ്റകൃത്യങ്ങളിൽ ഭാഗമാകുന്ന ആളുകളെയും വ്യക്തികളെയും ഒന്നും പിന്തുടർന്ന സിനിമയല്ല. മറിച്ച് ഇതെല്ലാം എടുത്ത് നമ്മുടെ രീതിയിൽ ഫിക്‌ഷൻ എന്ന രൂപത്തിലാണ് കളങ്കാവൽ ഒരുക്കിയത്‌.

സാംസ്കാരിക മണ്ഡലങ്ങളിലൂടെ

കളത്തിന്‌ കാവൽ കളങ്കാവൽ എന്നത് ദേവീക്ഷേത്രത്തിലെ ആചാരമാണ്. സിനിമയിൽ ആചാരം എന്നതിനപ്പുറം ആചാരത്തിലേക്ക് വഴിവയ്ക്കുന്ന കാരണത്തിനാണ് പ്രാധാന്യം. നന്മയും തിന്മയും തമ്മിലുള്ള ഭദ്രകാളിയും ദാരികനുമായി ബന്ധപ്പെട്ട ഐതിഹ്യമാണത്. അതാണ് സിനിമയിലും ഉപയോഗിച്ചിട്ടുള്ളത്. കളങ്കാവലിന്റെ വാച്യാർഥം മലയാളത്തിലും തമിഴിലും ഒന്നാണ്. കളത്തിന് കാവൽ നിൽക്കുക എന്നാണത്. തമിഴ്നാടിന്റെയും കേരളത്തിന്റെയും സാംസ്കാരികമണ്ഡലങ്ങൾ കടന്നുവരുന്ന സിനിമയാണ്. ഞാനും സുഹൃത്ത്‌ ജിഷ്‌ണുവും ചേർന്നാണ്‌ തിരക്കഥ എഴുതിയത്‌. സിനിമയിൽ പറയുന്ന സംഭവങ്ങൾ എനിക്കും അറിയുന്നതാണ്‌. എന്നാൽ, ആദ്യം സിനിമയാക്കാൻ കഴിയുമെന്ന്‌ തോന്നിയില്ല. പിന്നീട്‌ ഞങ്ങളുടെ പൊതുസുഹൃത്ത്‌ ഇതുമായി ബന്ധപ്പെട്ട വേറെ കാര്യങ്ങൾ പറഞ്ഞു. എന്നാൽ, ആദ്യം സിനിമയാക്കാൻ പറ്റുമെന്ന ചിന്ത ഉണ്ടായില്ല. പക്ഷേ, പിന്നീടുള്ള ആലോചനയിലാണ്‌ സിനിമയുടെ സാധ്യത വരുന്നത്‌.

പുതിയ കൂട്ടുകെട്ട്

ആദ്യം വേറെ ചില ആളുകളാണ് ആലോചനയിലുണ്ടായത്. പിന്നീട് മമ്മൂട്ടിയിലേക്ക് എത്തുകയായിരുന്നു. അതിനനുസരിച്ച് ഞാനും സിനിമാപ്രവർത്തകരും ചർച്ച നടത്തി. ഇതിലെ മറ്റൊരു കഥാപാത്രത്തിനായി പലരുമായും ചർച്ചകൾ നടന്നിരുന്നു. ഞങ്ങളുടെ മനസ്സിലും വിനായകൻ ഉണ്ടായിരുന്നു. എന്നാൽ, ഈ കഥാപാത്രം വിനായകൻ ചെയ്താൽ നന്നാകുമെന്ന് പറഞ്ഞത്‌ മമ്മൂക്കയാണ്‌. മലയാള സിനിമയിൽ ഇതുവരെ മമ്മൂട്ടി–വിനായകൻ കൂട്ടുകെട്ട് ഉണ്ടായിട്ടുമില്ല. ഒരു പ്രധാന കഥാപാത്രത്തെ മമ്മൂട്ടി ചെയ്യുന്നു എന്നതിന്റെ ആകാംക്ഷ ഞങ്ങൾക്കുണ്ടായിരുന്നു. വിനായകൻകൂടി എത്തിയപ്പോൾ സിനിമ അടുത്ത തലത്തിലേക്ക് ഉയർന്നു. വിനായകൻ സ്ഥിരമായി ചെയ്യുന്ന കഥാപാത്രങ്ങളിൽനിന്ന് വ്യത്യസ്തമായ റോളാണ്. ഏതു സിനിമയായാലും ഒരു സിഗ്നേച്ചർ പതിപ്പിച്ച ചരിത്രമാണ് വിനായകനുള്ളത്. കളങ്കാവലിലും അത്‌ ആവർത്തിച്ചിട്ടുണ്ട്.

കൊടുക്കൽ, വാങ്ങൽ

മമ്മൂട്ടി എന്ന നടൻ നമ്മുടെ മനസ്സിലുണ്ട്‌. അത്‌ മനസ്സിൽവച്ച്‌ എഴുത്തി രൂപപ്പെടുത്തിയ സിനിമയാണ്‌. അതേസമയം, അദ്ദേഹം എന്തുകൊണ്ട്‌ മമ്മൂട്ടിയായി നിൽക്കുന്നുവെന്നതിന്റെ ഉത്തരം ചിത്രീകരണത്തിനിടയിൽ നമുക്ക്‌ കിട്ടും. നമ്മുടെ സിനിമാ ഡിസൈനിൽ നിന്നുകൊണ്ട്‌ അദ്ദേഹം തുടരെ തുടരെ കാര്യങ്ങൾ പറഞ്ഞുതരും. എല്ലാം അഭിപ്രായങ്ങളായാണ്‌ പറയുക. നമുക്ക്‌ ആവശ്യമെങ്കിൽ എടുക്കാം. അങ്ങനെ ഒരു കൊടുക്കൽ, വാങ്ങൽ സിനിമയുടെ ചിത്രീകരണത്തിലുടനീളം നടന്നിട്ടുണ്ട്‌. വിനായകൻ ഓരോ രംഗത്തിനുമുമ്പും സഹ അഭിനേതാക്കളുമായി ചർച്ച നടത്തും. വളരെ ചെറിയ സംഭാഷണങ്ങളിൽപ്പോലും ശ്രദ്ധാലുവാണ്‌. കഥാപാത്രത്തെ പൂർണമായും ഉൾക്കൊണ്ടാണ്‌ ചെയ്‌തിട്ടുള്ളത്‌. മമ്മൂക്കയുടെ വേറൊരു രൂപംതന്നെയാണ്‌ വിനായകനും. ​

വെല്ലുവിളി

മമ്മൂട്ടിസിനിമ ചെയ്യുക എന്നു പറയുന്നത് എല്ലാവരെയും ആവേശഭരിതരാക്കുന്ന കാര്യമാണ്. ഞാൻ ആദ്യമായി ചെയ്യുന്ന സിനിമയാണ്. എനിക്ക് മുൻ മാതൃകകളില്ല. അതിനാൽത്തന്നെ മമ്മൂട്ടിയെ വച്ചാണ് സിനിമ ചെയ്യുന്നത് എന്നത് നേട്ടമാകുമ്പോൾത്തന്നെ അതിൽ കുറെ കടമ്പകളുമുണ്ടായിരുന്നു. പുതുമ കൊണ്ടുവരിക എന്ന വെല്ലുവിളിയുമുണ്ട്. എന്നാൽ, എഴുത്തിൽ നിർബന്ധബുദ്ധിയോടെ പുതുമ കൊണ്ടുവരാൻ ശ്രമിച്ചിട്ടില്ല. മമ്മൂട്ടി അഭിനയിക്കുമ്പോൾ സ്വാഭാവികമായും അതിൽ പുതുമ കടന്നുവരും. അതുകൊണ്ടാണ് അദ്ദേഹം ഇത്രകാലമായിട്ടും ഇതിഹാസനടനായി നിലനിൽക്കുന്നത്. അതേസമയം, സിനിമ ചെയ്യുമ്പോൾ നിർബന്ധമായും പുതുമ കൊണ്ടുവരണമെന്ന് ചിന്തിച്ച്‌ ഒരുവിധ പരിശ്രമവും നടത്തിയിട്ടില്ല. എല്ലാം സ്വാഭാവികമായും കടന്നുവന്നതാണ്.

വിട്ടുവീഴ്‌ചകളില്ല

മമ്മൂട്ടി എന്ന താരത്തിനുവേണ്ടി അദ്ദേഹത്തിന്റെ സ്റ്റാർഡത്തിനായി വിട്ടുവീഴ്ചകൾ വരുത്തിയിട്ടില്ല. നടൻ എന്ന നിലയിലാണ് സിനിമയിൽ ഉപയോഗിച്ചിട്ടുള്ളത്. മമ്മൂട്ടി എന്ന നടന്റെ സാധാരണ നിലയിലുള്ള റേഞ്ച് മനസ്സിൽ കണ്ടാണ്‌ എഴുതിയത്‌. അതിനപ്പുറത്തേക്കുള്ള ചിന്തകൾ ഉണ്ടായിട്ടില്ല. മമ്മൂട്ടി അടുത്തകാലത്തായി ചെയ്ത കഥാപാത്രങ്ങളെല്ലാം വ്യത്യസ്തമായിരുന്നു. അദ്ദേഹത്തിന്റെ ആ ചരിത്രം നമ്മുടെ മുന്നിലുണ്ട്. അതിനാൽത്തന്നെ പുതുമ സൃഷ്ടിക്കണം എന്നൊരു കടമ്പ നമ്മുടെ മുമ്പിൽ ഉണ്ടായിരുന്നില്ല. പുതിയത് ചെയ്യാനുള്ള അദ്ദേഹത്തിന്റെ താൽപ്പര്യം നമുക്കറിയാം. ​കഥയല്ല, ആദ്യംതന്നെ സിനിമയുടെ തിരക്കഥ പൂർണമായും പറയാൻ അവസരം കിട്ടി. കേൾക്കുമ്പോൾത്തന്നെ അദ്ദേഹത്തിന്‌ നല്ല താൽപ്പര്യം വന്നുവെന്നാണ്‌ തോന്നിയത്‌. കഥയിൽ മമ്മൂട്ടിക്ക് സംശയങ്ങൾ ഉണ്ടായിരുന്നു. അദ്ദേഹം അത്‌ ചോദിക്കുകയും മറുപടി പറയുകയും ചെയ്തു. ആ പ്രോസസ് നല്ല ആത്മവിശ്വാസം നൽകി. അദ്ദേഹംതന്നെ നിർമിക്കാമെന്നും പറഞ്ഞു.

സാങ്കേതിക നിലവാരം

ആദ്യസിനിമയാണ്‌. സിനിമ എല്ലാ മേഖലയിലും മികച്ച നിലവാരം പുലർത്തേണ്ടത്‌ അനിവാര്യമാണ്‌. തിരക്കഥ നോൺ ലീനിയർ രീതിയിലാണ്‌ പോകുന്നത്‌. അതേസമയം, തിരക്കഥ എഴുതിയേപ്പോൾത്തന്നെ ശബ്ദ, ദൃശ്യ സാധ്യതകളുടെ ബ്ലൂപ്രിന്റുകൂടി തയ്യാറാക്കിയിരുന്നു. എഡിറ്റിങ്‌, സംഗീതം, ശബ്ദം ഇതിന്റെയെല്ലാം വിശദമായ കാര്യങ്ങൾ ആദ്യംതന്നെ മനസ്സിലുണ്ടായിരുന്നു. എല്ലാ മേഖലയിലും നല്ല ആളുകളെ കിട്ടി. കഥാപാത്രങ്ങളെയും കഥാഗതിയെയും താഴേക്ക്‌ പോകാതെ ഒന്നുകൂടി ഉയർത്തുന്നതിന്‌ സാങ്കേതികമേഖലയിൽനിന്ന്‌ നല്ല പിന്തുണ കിട്ടി. ചിത്രീകരണത്തിന്റെ ഓരോ ഘട്ടത്തിലും നമ്മൾ ഉദ്ദേശിക്കുന്നപോലെയാണോ കാര്യങ്ങൾ വരുന്നതെന്ന്‌ പരിശോധിക്കാൻ സ്‌പോട്ട്‌ എഡിറ്റിങ്‌ അടക്കം സഹായിച്ചു. നമ്മൾ ഉദ്ദേശിച്ചപോലെ സിനിമ ഒരുക്കാൻ പറ്റിയെന്നാണ്‌ വിശ്വാസം.