'കല്ലെറിഞ്ഞത് പൂവാലൻ, കല്ലിനെ ശിക്ഷിച്ച് കോടതി'; കവിത പങ്കുവെച്ച് കുരീപ്പുഴ ശ്രീകുമാർ

തിരുവനന്തപുരം: നടിയെ തട്ടിക്കൊണ്ടുപോയി ആക്രമിച്ച്‌ അപകീർത്തികരമായ ദൃശ്യങ്ങൾ പകർത്തിയ കേസിലെ കോടതി വിധിയ്ക്കെതിരെ പരോക്ഷ വിമർശനവുമായി കവി കുരീപ്പുഴ ശ്രീകുമാർ. ആധിജീവിതം എന്ന തന്റെ കവിത ഫെയ്സ്ബുക്കിൽ പങ്കുവെച്ചു കൊണ്ടാണ് കോടതി നടപടിയെ അദ്ദേഹം വിമർശിച്ചത്.

ആധിജീവിതം

ബസ്റ്റോപ്പിൽ നിന്ന കോളേജ് യുവതിയെ

ഒളിഞ്ഞുനിന്നു കല്ലെറിഞ്ഞു പൂവാലൻ

നെറ്റിയിലും ഹൃദയത്തിലും

മുറിവേറ്റ അവൾ കോടതിയിലേക്കോടി

കോടതി കല്ലിനെ ശിക്ഷിച്ചു.

എട്ടരവർഷം നീണ്ട കേസ്‌; 
9 മിനിറ്റിൽ വിധി

രാജ്യം കാതോർത്ത വിധിപ്രസ്‌താവം ഒന്പത്‌ മിനിറ്റിൽ. നടിയെ ആക്രമിച്ച കേസിൽ തിങ്കൾ പകൽ 11ന്‌ കോടതി നടപടികൾ തുടങ്ങി. അതിനുംമുന്പേ കോടതിക്കകം അഭിഭാഷകർ, നിയമവിദ്യാർഥികൾ, മാധ്യമപ്രവർത്തകർ, പ്രതികളുടെ ബന്ധുക്കൾ ഉൾപ്പെടെയുള്ളവരാൽ നിറഞ്ഞിരുന്നു. കോടതിക്കകത്ത്‌ ഇടം ലഭിക്കാത്തവർ പുറത്ത്‌ ജനലരികിലും മറ്റുമായി നിലയുറപ്പിച്ചു.

കോടതിക്കുള്ളിലേക്ക്‌ എത്തിയ ജഡ്‌ജി ഹണി എം വർഗീസ്‌ ആദ്യം ആവശ്യപ്പെട്ടത്‌ പ്രതികളെ കാണാൻ കഴിയുംവിധത്തിൽ മറ്റുള്ളവർ ഒതുങ്ങിനിൽക്കാനും സഹകരിക്കാനുമായിരുന്നു. തുടർന്ന്‌ വിധിപ്രസ്‌താവത്തിലേക്ക്‌. പ്രതിക്കൂട്ടിലെ രണ്ടറ്റത്തായാണ്‌ ദിലീപും പൾസർ സുനിയും നിന്നിരുന്നത്‌. ദിലീപ്‌, സുനിക്ക്‌ മുഖംകൊടുത്തില്ല. ജഡ്‌ജി വിധിപ്രസ്‌താവം തുടങ്ങിയതോടെ ദിലീപ്‌ കണ്ണുകളടച്ചു.

ഒന്നുമുതൽ ആറുവരെയുള്ള പ്രതികൾ കുറ്റക്കാരാണെന്നും ദിലീപ്‌ ഉൾപ്പെടെയുള്ളവർ കുറ്റക്കാരല്ലെന്നും ജഡ്‌ജി പറഞ്ഞു. അത്‌ കേട്ടതോടെ ദിലീപിന്‌ ചുറ്റുമുള്ളവരിൽനിന്ന്‌ ദീർഘനിശ്വാസമുയർന്നു. തുടർന്ന്‌ അഭിഭാഷകർക്കൊപ്പം പുറത്തേക്ക്‌. നടപടിക്രമങ്ങൾ പൂർത്തിയാക്കിയശേഷം പൾസർ സുനിയേയും മറ്റു പ്രതികളെയും വിയ്യൂർ സെൻട്രൽ ജയിലിലേക്ക്‌ മാറ്റി.