യുഎസ് തെരഞ്ഞെടുപ്പിന് പിന്നാലെ ആന്ത്രോപിക്കിന് തിരിച്ചടി; കമ്പനിയുടെ പ്രതീക്ഷിത മൂല്യത്തിൽ വൻ ഇടിവ്

ന്യൂയോർക്ക്: അമേരിക്കയിലെ ഇടക്കാല തെരഞ്ഞെടുപ്പിന് പിന്നാലെ എഐ കമ്പനിയായ ആന്ത്രോപിക്കിന് (Anthropic) തിരിച്ചടി. ഓഹരി വിപണിയിൽ പ്രവേശിക്കാനൊരുങ്ങുന്ന കമ്പനിയുടെ പ്രതീക്ഷിത വിപണിമൂല്യത്തിൽ വൻ ഇടിവ്. കമ്പനിയുടെ മൂല്യം രണ്ട് ലക്ഷം കോടി ഡോളറിൽനിന്ന് 1.1 ലക്ഷം കോടി ഡോളർ വരെയായി താഴ്ന്നേക്കുമെന്നാണ് വിലയിരുത്തൽ. എഐ സാങ്കേതികവിദ്യയ്ക്കും വൻകിട ഡാറ്റാ സെന്ററുകൾക്കുമെതിരെ അമേരിക്കയിൽ ശക്തിപ്പെടുന്ന എതിർപ്പാണ് നിക്ഷേപകരുടെ ആശങ്കയ്ക്ക് പ്രധാന കാരണം.

നവംബർ മൂന്നിന് നടന്ന ഇടക്കാല തെരഞ്ഞെടുപ്പിൽ എഐ കമ്പനികളുടെ നിയന്ത്രണവും ഡാറ്റാ സെന്ററുകളുടെ വ്യാപനവും പ്രധാന ചർച്ചാവിഷയങ്ങളായിരുന്നു. എഐ മേഖലയ്ക്ക് കർശന നിയന്ത്രണങ്ങൾ ഏർപ്പെടുത്തണമെന്ന് ആവശ്യപ്പെട്ട സ്ഥാനാർഥികൾ വിവിധ സംസ്ഥാനങ്ങളിൽ വിജയിച്ചു. ഡാറ്റാ സെന്ററുകളുമായി ബന്ധപ്പെട്ട 41 പ്രാദേശിക വോട്ടെടുപ്പുകളിൽ 40 എണ്ണത്തിലും പദ്ധതികൾക്കെതിരായ നിലപാടാണ് വിജയിച്ചതെന്ന് മാധ്യമങ്ങൾ റിപ്പോർട്ട് ചെയ്തു.

അമേരിക്കൻ ഓഹരി വിപണിയിലും എഐ കമ്പനികൾക്ക് കനത്ത തിരിച്ചടിയുണ്ടായി. സാങ്കേതികവിദ്യാ കമ്പനികൾക്ക് പ്രാധാന്യമുള്ള നാസ്ഡാക് സൂചിക കഴിഞ്ഞയാഴ്ച 19 മാസത്തിനിടയിലെ ഏറ്റവും വലിയ ഇടിവ് രേഖപ്പെടുത്തി. എഐ ചിപ്പ് നിർമാതാക്കളുടെയും ഡാറ്റാ സെന്റർ അടിസ്ഥാനസൗകര്യങ്ങൾ ഒരുക്കുന്ന കമ്പനികളുടെയും ഓഹരികളെയാണ് ഇടിവ് കൂടുതൽ ബാധിച്ചത്.

ഒക്ടോബർ ആദ്യം ആന്ത്രോപിക്കിന്റെ മൂല്യം രണ്ട് ട്രില്യൺ ഡോളർ വരെയാകുമെന്നായിരുന്നു പ്രതീക്ഷ. എന്നാൽ കമ്പനിയുടെ സാമ്പത്തിക സ്ഥിതി പുറത്തുവന്നതോടെ ഇത് 1.4 മുതൽ 1.5 ട്രില്യൺ ഡോളർ വരെയായി കുറഞ്ഞു. അമേരിക്കൻ തെരഞ്ഞെടുപ്പിനുശേഷം എഐ കമ്പനികൾക്കെതിരായ പൊതുജനവികാരവും ഓഹരിവിപണിയിലെ ഇടിവും ശക്തമായ സാഹചര്യത്തിൽ ആന്ത്രോപിക്കിന്റെ ഐപിഒ മറ്റ് എഐ കമ്പനികളുടെ ഭാവിക്കും നിർണായകമാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ.