'എന്റെ ഭാര്യയാണ്, ഒന്നും മറച്ചുവയ്ക്കാനില്ല'; ചിത്രം പങ്കുവച്ച് റാഷിദ് ഖാൻ

കാബുൾ: രണ്ടാം വിവാഹം സ്ഥിരീകരിച്ച് അഫ്ഗാനിസ്ഥാൻ ക്രിക്കറ്റ് ടീം ക്യാപ്റ്റൻ റാഷിദ് ഖാൻ. കഴിഞ്ഞ ദിവസം യുവതിക്കൊപ്പമുള്ള ദൃശ്യങ്ങൾ വൈറലായതിന് പിന്നാലെയാണ് താരം വീണ്ടും വിവാഹിതനായ കാര്യം സമൂഹമാധ്യമങ്ങളിൽ പങ്കുവച്ചത്. വിവാഹചിത്രങ്ങളും ഇൻസ്റ്റ​ഗ്രാമിൽ പങ്കുവച്ചിട്ടുണ്ട്.

‘‘22025 ആഗസ്ത് രണ്ടിന് ജീവിതത്തിലെ പുതിയ ഒരു അധ്യായം ആരംഭിച്ചു. നിക്കാഹ് നടത്തി വിവാഹം കഴിച്ചു. ഭാര്യയുമൊന്നിച്ച് ഒരു ചാരിറ്റി പരിപാടിയിൽ അടുത്തിടെ പങ്കെടുത്തിരുന്നു. അതിന്റെ ചിത്രങ്ങൾ എടുത്താണ് അഭ്യൂഹങ്ങൾ പ്രചരിപ്പിക്കുന്നത്. അവൾ ഭാര്യയാണ്. ഇവിടെ ഒന്നും ഒളിക്കാനില്ല. എന്നെ പിന്തുണയ്ക്കുകയും മനസിലാക്കുകയും ചെയ്ത എല്ലാവർക്കും നന്ദി.’’– റാഷിദ് ഖാൻ ഇൻസ്റ്റയിൽ കുറിച്ചു.

നെതർലൻഡ്സിൽ നടന്ന റാഷിദ് ഖാൻ ചാരിറ്റബിൾ ഫൗണ്ടേഷന്റെ പ്രഖ്യാപനച്ചടങ്ങിലാണ് ഭാര്യയും താരവും പങ്കെടുത്തത്. 2024 ഒക്ടോബറിൽ കാബൂളിൽ വെച്ചാണ് റാഷിദ് ആദ്യം വിവാഹിതനായത്. അഫ്ഗാനിസ്ഥാൻ ലോകകപ്പ് നേടിയ ശേഷം മാത്രമേ വിവാഹം കഴിക്കൂ എന്ന് പ്രഖ്യാപിച്ചിരുന്ന, താരത്തിന്റെ ആദ്യ വിവാഹവും നേരത്തെ വാർത്തകളിൽ ഇടം പിടിച്ചിരുന്നു.