ഇനി ആക്ഷൻ കാലം; റിലീസിനൊരുങ്ങി 'സിസു: റോഡ് ടു റിവഞ്ച്'

2022ൽ പുറത്തിറങ്ങിയ ഹിറ്റ് ആക്ഷൻ റിവഞ്ച് ചിത്രം സിസുവിന്റെ രണ്ടാം ഭാ​ഗം റിലീസിനൊരുങ്ങുന്നു. നവംബർ 21ന് ചിത്രം ഇന്ത്യയിൽ റിലീസ് ചെയ്യും. ആറ്റമി കോർപ്പി എന്ന പട്ടാളക്കാരന്റെ ഒറ്റയാൾ പോരാട്ടത്തിന്റെ കഥ പറഞ്ഞ സിസു ആദ്യഭാ​ഗം ശ്രദ്ധിക്കപ്പെട്ടിരുന്നു. ജൽമാരി ഹെലാൻഡറാണ് സംവിധാനം. ഫിൻലൻഡും നാസി ജർമനിയും തമ്മിൽ നടന്ന ലാപ്‍ലാൻഡ് യുദ്ധത്തിന്റെ പശ്ചാത്തലത്തിലൊരുങ്ങിയ ഒന്നാം ഭാ​ഗത്തിനു ശേഷം കൂടുതൽ ആക്ഷനും മറ്റൊരു കഥയുമായാണ് സിസു 2 എത്തുന്നത്. ജോർമ തോമ്മിലയാണ് ആറ്റമി കോർപ്പായി എത്തുന്നത്.

ലോകമെമ്പാടും ആകെ 14.3 മില്യൺ ഡോളറാണ് ചിത്രം നേടിയത്. സബ്സീറോ ഫിലിം എന്റർടൈൻമെന്റിനു വേണ്ടി പെട്രി ജോകിരാന്തയും ഗുഡ് ചാവോസിനും വേണ്ടി മൈക്ക് ഗുഡ്രിഡ്ജും ചേർന്നാണ് സിസു 2 നിർമിക്കുന്നത്. എസ്റ്റോണിയയിലാണ് സിസു 2 ചിത്രീകരണം പൂർത്തിയാക്കിയത്. സെപ്തംബർ 21ന് ഫന്റാസ്റ്റിക് ഫെസ്റ്റിൽ ചിത്രം പ്രദർശിപ്പിച്ചു. ഫിൻലൻഡിൽ ഒക്ടോബർ 22ന് എസ്എഫ് ഫിലിം ഫിൻലാൻഡ് ചിത്രം റിലീസ് ചെയ്തു.