മോശം കാലാവസ്ഥ; കൊളംബോയിലേക്കുള്ള രണ്ട് വിമാനങ്ങൾ തിരുവനന്തപുരത്തേക്ക് തിരിച്ചുവിട്ടു

തിരുവനന്തപുരം: മോശം കാലാവസ്ഥയെ തുടർന്ന് ശ്രീലങ്കയിലേക്കുള്ള രണ്ട് വിമാനങ്ങൾ തിരുവനന്തപുരത്തേക്ക് തിരിച്ചുവിട്ടു. മിഡിൽ ഈസ്റ്റിൽ നിന്ന് കൊളംബോയിലേക്കുള്ള രണ്ട് വിമാനങ്ങളാണ് തിരുവനന്തപുരം അന്താരാഷ്ട്ര വിമാനത്താവളത്തിലേക്ക് തിരിച്ചുവിട്ടത്.

ഇസ്താംബൂളിൽ നിന്നുള്ള തുർക്കി എയർലൈൻസ് വിമാനവും സൗദി അറേബ്യയിലെ ദമ്മാമിൽ നിന്നുള്ള ശ്രീലങ്കൻ എയർലൈൻസിന്റെ വിമാനവുമാണ് വഴിതിരിച്ചുവിട്ടത്. തുർക്കി എയർലൈൻസിന്റെ വിമാനത്തിൽ 258 യാത്രക്കാരും 10 ജീവനക്കാരുമുണ്ടായിരുന്നു. ജീവനക്കാർ ഉൾപ്പെടെ 188 പേരാണ് ശ്രീലങ്കൻ എയർലൈൻസിന്റെ വിമാനത്തിലുണ്ടായിരുന്നത്.

രണ്ട് വിമാനങ്ങളും രാവിലെ ഏഴോടെ തിരുവനന്തപുരം വിമാനത്താവളത്തിൽ സുരക്ഷിതമായി ഇറങ്ങി. കാലാവസ്ഥ അനുകൂലമായതിനെത്തുടർന്ന് തുർക്കി എയർലൈൻസിന്റെ വിമാനം രാവിലെ 8.38 നും ശ്രീലങ്കൻ എയർലൈൻസിന്റെ വിമാനം 8.48 നും കൊളംബോയിലേക്ക് പുറപ്പെട്ടതായി ടിയാൽ അറിയിച്ചു.