'മേ ദ ഫോർത്ത് ബീ വിത് യൂ' : സ്റ്റാർ വാർസ് ഡേ ആഘോഷിച്ച് ​ഗൂഗിൾ

ലോകമെമ്പാടുമായി നിരവധി ആരാധകരുള്ള പരമ്പരയാണ് സ്റ്റാർ വാർസ്. മെയ് 4 ആണ് സ്റ്റാർ വാർസ് ഡേ ആയി ആരാധകർ ആഘോഷിക്കാറുള്ളത്. ഈ ദിനത്തിൽ സ്റ്റാർ വാർസ് പ്രേമികൾക്ക് സർ‌പ്രൈസ് ഒരുക്കി ആഘോഷത്തിൽ പങ്കുചേർന്നിരിക്കുകയാണ് ​ഗൂ​ഗിൾ. സ്റ്റാർ വാർസ് ( Star Wars' ) എന്നോ മേയ് ദ ഫോർത്ത് ബീ വിത്ത് യൂ ('May the Fourth be with you' ) എന്നോ ​ഗൂ​ഗിളിൽ ടൈപ്പ് ചെയ്ത് സെർച്ച് ചെയ്യുമ്പോഴാണ് സർ‌പ്രൈസ്. വ്യത്യസ്ത നിറങ്ങളിലുള്ള കൺഫെറ്റികളും സ്റ്റാർ വാർസിലെ പ്രധാന കഥാപാത്രങ്ങളും പ്രശസ്ത ഡയലോ​ഗുകളും പേജിന്റെ മുകളിൽ നിന്ന് താഴേക്ക് വരുന്നതായി കാണാം. ഓരോ തവണ സ്റ്റാർ വാർസ് എന്ന് ടൈപ്പ് ചെയ്യുമ്പോഴും ഇത് കാണാൻ സാധിക്കും.

സിനിമയിലെ ഏറ്റവും ജനപ്രിയമായ ക്യാച്ച്‌ഫ്രെയ്‌സുകളിലൊന്നാണ് മേ ദ ഫോഴ്സ് ബീ വിത്ത് യൂ ("May the force be with you."). ഇതിനു മാറ്റം വരുത്തി ആരാധകരാണ് മേയ് ദ ഫോർത്ത് ബീ വിത്ത് യൂ ('May the Fourth be with you' ) എന്ന് പറഞ്ഞുകൊണ്ട് മെയ് നാല് സ്റ്റാർ വാർസ് ദിനമായി ആഘോഷിക്കുന്നത്. ഇത് അനൗദ്യോ​ഗികമായുള്ള ആഘോഷ ദിനമാണ്. സെർച്ച് ചെയ്യുമ്പോൾ കൺഫെറ്റിക്കൊപ്പം സ്റ്റാർ വാർസിലെ പ്രശസ്ത കഥാപാത്രങ്ങളായ ഗ്രോഗു (ബേബി യോഡ), വിക്കറ്റ് ദ ഇവോക്, ഹ്യൂമനോയിഡ് റോബോട്ടായ C-3PO, സാങ്കൽപ്പിക റോബോട്ട് കഥാപാത്രമായ R2-D2 എന്നിവയും സ്ട്രോംട്രൂപ്പർ ഹെൽമറ്റുകളും പ്രത്യക്ഷപ്പെടുന്നു.

ജോർജ്ജ് ലൂക്കാസ് സൃഷ്ടിച്ച ഒരു സ്പേസ് ഡ്രാമ ഫ്രാഞ്ചൈസിയാണ് സ്റ്റാർ വാർസ്. ഇതിലെ ആദ്യ ചിത്രം സ്റ്റാർ വാർസ് എന്ന പേരിലാണ് പുറത്തിറങ്ങിയത്. പിന്നീട് സ്റ്റാർ വാർസ്: എ ന്യൂ ഹോപ് എന്ന് പുനർനാമകരണം ചെയ്തു. 1977 മെയ് 25-ന് 20ത് സെഞ്ച്വറി ഫോക്സ് ആണ് ആദ്യ ചിത്രം പുറത്തിറക്കിയത്. മൂന്ന് വർഷങ്ങളുടെ ഇടവേളയിൽ രണ്ട് ചിത്രങ്ങൾ കൂടി പുറത്തിറങ്ങിയതോടെ സ്റ്റാർ വാർസ് ഏറെ ജനപ്രിയമായി.

ഈ മൂന്ന് സിനിമകൾക്ക് ശേഷം 16 വർഷം കഴിഞ്ഞ് പരമ്പരയിലെ അടുത്ത ചിത്രവും 2005-ൽ അവസാന ചിത്രവും പുറത്തിറങ്ങി. ഇവ കൂടാതെ നിരവധി സ്പിൻ ഓഫ് ചിത്രങ്ങളും സീരീസുകളും കോമിക്കുകളും വീഡിയോ ​ഗെയിമുകളും സ്റ്റാർ വാർസിന്റേതായി പുറത്തിറങ്ങിയിട്ടുണ്ട്. ജെയിംസ് ബോണ്ട്, ഹാരി പോട്ടർ എന്നിവക്ക് പിന്നിലായി ഏറ്റവുമധികം പണം കൊയ്ത മൂന്നാമത്തെ ചലച്ചിത്ര പരമ്പരയാണ് സ്റ്റാർ വാർസ്.

1977ൽ പുറത്തിറങ്ങിയ സ്റ്റാർ വാർസ് എപ്പിസോഡ് IV: എ ന്യൂ ഹോപ്പ് (Episode IV: A New Hope) ആണ് ഫ്രാഞ്ചൈസിയിലെ ആദ്യ ചിത്രം. തുടർന്ന് സ്റ്റാർ വാർസ് എപ്പിസോഡ് V: ദ എംപയർ സ്ട്രൈക്സ് ബാക്ക് ( Episode V: The Empire Strikes Back -1980), സ്റ്റാർ വാർസ് എപ്പിസോഡ് VI : റിട്ടേൺ ഓഫ് ദ ജേഡി (Episode VI: Return of the Jedi -1983) എന്നി ചിത്രങ്ങളും പുറത്തിറങ്ങി. ഇവയെയാണ് ഒറിജിനൽ സ്റ്റാർ‌ വാർസ് ട്രിലജി ( original Star Wars trilogy) എന്ന് പറയുന്നത്. തുടർന്ന് ജോർജ് ലൂക്കാസ് മൂന്ന് പ്രീക്വൽ സ്റ്റാർ വാർസ് ട്രിലജികളും ഒരുക്കി. എപ്പിസോഡ് I : ദ ഫാന്റം മെനേസ് ( Episode I: The Phantom Menace -1999), എപ്പിസോഡ് II : അറ്റാക്ക് ഓഫ് ദ ക്ലോൺസ് ( Episode II: Attack of the Clones - 2002), എപ്പിസോഡ് III: റിവഞ്ച് ഓഫ് ദ സിത്ത് (Episode III – Revenge of the Sith) എന്നിവയായിരുന്നു സ്റ്റാർ വാർസ് പ്രീക്വലുകൾ.

2012ൽ ലൂക്കാസ് തന്റെ പ്രൊഡക്ഷൻ കമ്പനി ഡിസ്നിക്ക് കൈമാറി. തുടർന്ന് എപ്പിസോഡ് VII: ദ ഫോഴ്സ് അവേക്കൻസ് ( Episode VII: The Force Awakens -2015), എപ്പിസോഡ് VIII: ദ ലാസ്റ്റ് ജേഡി ( Episode VIII: The Last Jedi -2017), എപ്പിസോഡ് IX: ദ റെസ് ഓഫ് സ്ക്കൈ വാക്കർ (Episode IX: The Rise of Skywalker-(2019) എന്നീ സീക്വലുകളും പുറത്തിറങ്ങി. ഈ 9 ചിത്രങ്ങളെയും ഒന്നായി സ്കൈവാക്കർ സാ​ഗ ( "Skywalker Saga") എന്നാണ് പറയുന്നത്. 2016ൽ റോ​ഗ് വൺ: എ സ്റ്റാർ വാർസ് സ്റ്റോറി (Rogue One: A Star Wars Story) , 2018ൽ സോളോ: എ സ്റ്റാർ വാർസ് സ്റ്റോറി (Solo: A Star Wars Story) എന്നീ സ്റ്റാൻഡ് എലോൺ ചിത്രങ്ങളും പുറത്തിറങ്ങി.

മെയ് നാലിന് ലോകമെമ്പാടുമായി ആരാധകർ സ്റ്റാർ വാർസ് ചിത്രങ്ങളുടെ സ്ക്രീനിങ്ങുകളും നടത്താറുണ്ട്. തങ്ങളുടെ പ്രിയകഥാപാത്രങ്ങളുടെ വേഷങ്ങൾ ധരിച്ചെത്തി സ്റ്റാർ വാർസ് തീമിൽ പാർടി സംഘടിപ്പിക്കുന്നതും വ്യാപകമാണ്.