കഥകളിയുടെ നവരസം നുണഞ്ഞ്‌ കുട്ടികൾ

കണ്ണൂർ

പാഠപുസ്തകത്തിൽ കണ്ടും ക്ലാസ് മുറിയിൽ കേട്ടും മാത്രം പരിചയിച്ച കഥകളി വേഷങ്ങൾ വാദ്യങ്ങളുടെയും സംഗീതത്തിന്റെയും അകമ്പടിയോടെ അരങ്ങിലെത്തി. നളനും ഹംസവും വേദിയിൽ നിറഞ്ഞാടി. കണ്ണൂർ സെന്റ്​ മൈക്കിൾസ് ആംഗ്ലോ ഇന്ത്യൻ ഹയർ സെക്കൻഡറി സ്കൂൾ വിദ്യാരംഗം കലാസാഹിത്യവേദിയും മലയാളം അധ്യാപക കൂട്ടായ്മയും ചേർന്നാണ്‌ തളിപ്പറമ്പ് കഥകളി പഠനകേന്ദ്രത്തിന്റെ സഹകരണത്തോടെ ‘രാജകീയം’ കഥകളി പാഠശാല സംഘടിപ്പിച്ചത്‌. കഥകളിയുടെ ചരിത്രം, വേഷം അഭിനയരീതി, വാദ്യം, ചടങ്ങുകൾ എന്നിവയെ പരിചയപ്പെടുത്തുന്ന പാഠശാലയ്ക്കും അവതരണത്തിനും കഥകളി കേന്ദ്രം ചെയർമാൻ കൃഷ്ണകുമാർ, പീശപ്പള്ളി രാജീവൻ എന്നിവർ നേതൃത്വംനൽകി. കോട്ടക്കൽ സുധീർ നളനായും കലാമണ്ഡലം ആദിത്യൻ ഹംസമായും വേഷമിട്ടു. സാരംഗ് പുല്ലൂർ, നിരഞ്ജൻ മോഹൻ (പാട്ട്), കോട്ടക്കൽ രമേശൻ (മദ്ദളം), കലാനിലയം സജിത്ത് പണിക്കർ (ചെണ്ട), കലാനിലയം പത്മനാഭൻ (ചുട്ടി), ടി എം പ്രേംനാഥ്, കഥകളി കേന്ദ്രം വൈശാഖ്, കഥകളി കേന്ദ്രം എ ദേവജിത്ത് (അണിയറ) എന്നിവരും ഭാഗമായി. പ്രധാനാധ്യാപകൻ ഫാ. ടോംസൻ ആന്റണി, എ സജിത്ത് എന്നിവർ സംസാരിച്ചു.