മഴവെള്ളക്കരുത്തിൽ കുന്നിൻചെരിവിൽ പച്ചക്കറിക്കൊയ് ത്ത്

തളിപ്പറമ്പ്​

കാടുമ‍ൂടിക്കിടക്കുന്ന മൊട്ടപ്പാറയിലെ കുന്നിൻചെരുവിൽ മഴക്കാലത്ത്‌ കുത്തിയൊലിച്ച്‌ പോകുന്ന വെള്ളത്തെ ഉപയോഗപ്പെടുത്തി പച്ചക്കറി കൃഷിയിൽ വിജയഗാഥ രചിച്ച്‌​ യുവകർഷകൻ​. കീഴാറ്റൂരിലെ പാറക്കെട്ടുകൾ നിറഞ്ഞ കുന്നിൻചെരുവിനെയാണ്​ കീഴാറ്റൂർ സ്വദേശി രജീഷ് മികച്ച പച്ചക്കറി ഉൽപ്പാദന കേന്ദ്രമാക്കി മാറ്റിയത്​. ഏഴ്​ ഏക്കറോളംവരുന്ന ഇവിടെ​ ജൈവ പച്ചക്കറിയാണ്‌ ഉൽപാദിപ്പിക്കുന്നത്‌​​​ ​. ഇവ സ്വന്തം നാടിനെ ബ്രാന്റ്​ ചെയ്​താണ്​ വിൽക്കുന്നത്​. രജീഷും കുടുംബവും കഠിനാധ്വാനത്തിലൂടെയാണ്‌ പച്ചക്കറിത്തോട്ടം ഒരുക്കിയത്‌. കൃഷിക്ക്‌ ജലസേചനം പൂർണമായും മഴയെയാണ്‌ ആശ്രയിക്കുന്നത്‌. മലഞ്ചെരിവിൽ മഴപെയ്യുമ്പോൾ വെള്ളം പച്ചക്കറികളെ നനച്ച്‌ അടിവാരത്തേക്ക്‌ വാർന്ന്‌ പോകും. ഒട്ടും വെള്ളം കെട്ടി നിൽക്കില്ല. ഇതാണ്‌ കൃഷിയുടെ വിജയം. കുന്നിറങ്ങി താഴേക്ക്​ പോകുന്തോറും വഴിയുടെ ഇരുഭാഗത്തും നിറഞ്ഞുനിൽക്കുന്ന പച്ചക്കറി കൃഷിയുടെ കാഴ്​ച ഹൃദ്യമാണ്​. തോട്ടത്തിൽ ആദ്യം നിറഞ്ഞുനിൽക്കുന്നത്​​ കീഴാറ്റൂർ കക്കിരിയാണ്​. നാടൻ വിത്തുപയോഗിച്ച കക്കിരി ഒരേക്കറിലാണ്​ കൃഷിചെയ്​തിരിക്കുന്നത്​. 60 സെന്റിൽ നാടനും ഹൈബ്രിഡുമായി പാവലും 50 സെന്റ്​ സ്ഥലത്ത്‌ നാടൻ പച്ചപടവലമുണ്ട്​. താലോലിയും വെണ്ടയും അര ഏക്കറിൽ കൃഷി ചെയ്​തിട്ടുണ്ട്​. രണ്ട്​ ഏക്കറിൽ ഇളവൻ, മത്തൻ, വെള്ളരി, ചേന എന്നിവയുണ്ട്‌. ഇതിനകം രണ്ട്​ ക്വിന്റലോളം താലോലി വിൽപ്പന നടത്തി. ഇത്തവണ മെയ്​ പകുതിമുതൽ മഴ ആരംഭിച്ചതിനാൽ ഓണത്തിനുമുമ്പായി പരമാവധി വിളവെടുക്കാൻ സാധിക്കുമെന്ന പ്രതീക്ഷയിലാണ്. മുള്ളൻപന്നി, മയിൽ എന്നിവയുടെ ശല്യമുണ്ട്​. തോട്ടത്തിന്​ ചുറ്റും വലകെട്ടിയാണ്‌ സംരക്ഷിക്കുന്നത്​. പന്നിശല്യം തടയാൻ തോട്ടത്തിൽ ടെന്റ് കെട്ടി താമസിക്കുകയാണ്​ രജീഷ്​. പന്നികളെ രാത്രികാലത്ത്​ പടക്കം പൊട്ടിച്ചാണ്​ ഓടിക്കുന്നത്​. കീടശല്യം ഒഴിവാക്കാൻ ഫിറമോൺ കെണിയും ഒരുക്കിയിട്ടുണ്ട്​. പ്രാണികളുടെ ശല്യംകുറയ്‌ക്കാൻ ധാരാളം ചെണ്ടുമല്ലി തൈകൾ നട്ടുപിടിപ്പിച്ചിട്ടുണ്ട്​. പച്ചക്കറി കൃഷിക്ക്​ ​ തളിപ്പറമ്പ്​ കൃഷിഓഫീസർ കുമാരി കെ ശ്രീഷ്​മ, കൃഷി അസിസ്​റ്റന്റ്​ കെ ടി രാമചന്ദ്രൻ എന്നിവർ മികച്ച സഹകരണമാണ്​ നൽകുന്നത്​. കൃഷിപ്പണിക്ക്​ അമ്മ ജാനകി, സഹോദരങ്ങളായ രാമകൃഷ്​ണൻ, രാജേഷ്​, ശ്രീധരി എന്നിവരുടെയും സുഹൃത്തുക്കളുടെയും സഹായമുണ്ട്​. വിളവെടുത്ത പച്ചക്കറികൾ ഹോർട്ടി കോർപ്പ്​, ചെത്ത്​ തൊഴിലാളി സഹകരണസംഘം, വെജ്​കോ എന്നിവ വഴിയും നേരിട്ടും വിൽപ്പന നടത്തുന്നു. രജീഷിന്റെ പച്ചക്കറിത്തോട്ടം കാണാൻ നിരവധി വിദ്യാർഥികൾ എത്താറുണ്ട്​.