ചൊവ്വ ജിഎച്ച്‌എസ്‌എസിലുമുണ്ട്‌ ആവി പറക്കും കിടിലൻ ബിരിയാണി

ചൊവ്വ

ഉച്ചഭക്ഷണത്തിന്‌ മണിമുഴങ്ങി. ചൊവ്വ ഹയർ സെക്കൻഡറി സ്കൂളിലെ മെസ്‌ ഹാളിലേക്ക് വരിവരിയായി കുട്ടികളെത്തി. ആവി പറക്കുന്ന ഭക്ഷണം വിളമ്പാനായി അധ്യാപകരും പിടിഎ ഭാരവാഹികളും റെഡി. കൈയിലെ പാത്രങ്ങളിൽ വെജിറ്റബിൾ ബിരിയാണിയുമായി മടങ്ങുമ്പോൾ ഓരോരുത്തരുടെ മുഖത്തും പത്തരമാറ്റ്‌ ചിരിതെളിഞ്ഞു. ‘ഭക്ഷണം എങ്ങിനെയുണ്ട്‘ എന്ന ചോദ്യത്തിന് ഏഴാം ക്ലാസിലെ ദേവി ശിവാനിയും നിയാമിക രസിന്തും ഫാത്തിമത്തുൽ ഹാദിയയും ഒരേസ്വരത്തിൽ പറഞ്ഞു ‘അടിപൊളി'. സ്‌കൂളിലെ പാചകക്കാരായ ശോഭനയുടെയും സുനിതയുടെയും കൈപ്പുണ്യത്തിനൊപ്പം സ്‌നേഹവും ചാലിച്ചാണ്‌ ഓരോ വിഭവവും തയ്യാറാക്കുന്നത്‌. പിടിഎ പ്രസിഡന്റും പഴയ പാരലൽ കോളേജ് അധ്യാപികയുമായ രാധിക മനോജും സ്‌കൂളിലെ മുൻ ജീവനക്കാരനായ കുടുക്കിമെട്ടയിലെ ഉത്തമനും മിക്ക ദിവസങ്ങളിലും സഹായത്തിനുണ്ടാകും. അധ്യാപകൻ അജയ് വൈഷ്ണവിനാണ് ഭക്ഷണത്തിന്റെ ചുമതല. മറ്റ്‌ അധ്യാപകരായ ഷീജ, റൂബി, ഓഫീസ് അസിസ്റ്റന്റ്‌ നിബിൻ എന്നിവരും ഒപ്പമുണ്ടാകും. എല്ലാത്തിനും മേൽനോട്ടവുമായി പ്രധാനാധ്യാപിക പി ശ്രീജയുമുണ്ട്‌. അഞ്ച് മുതൽ എട്ടാംതരം വരെയുള്ള 570 കുട്ടികൾക്ക് ഇവിടെ ഭക്ഷണം നൽകുന്നു. ചോറിനൊപ്പം വിവിധ ദിവസങ്ങളിൽ സാമ്പാർ, കടല, വൻപയർ, ചെറുപയർ എന്നിവയിലേതെങ്കിലും ഒന്നിന്റെയൊപ്പം നേന്ത്രക്കായയോ, മരച്ചീനിയോ ചേർത്തുണ്ടാക്കിയ പുഴുക്ക്, പച്ചടി, ഇഞ്ചിത്തൈര്, പുളിശേരി, സോയ ചേർത്ത മസാലക്കറി, മുട്ട റോസ്റ്റ്, മുട്ട ബുർജി ഇങ്ങനെ നീളുന്നു കറികളിലെ വൈവിധ്യം. പുറമെ, മാസത്തിൽ മൂന്നോ, നാലോ തവണ ചിക്കൻ കറിയും പായസവുമുണ്ടാകും. പാചകത്തിനുള്ള തൈര്, പാൽ വാങ്ങി സ്കൂളിൽ തന്നെ ഉണ്ടാക്കുകയാണ്‌. വിഭവങ്ങൾക്കായുള്ള പച്ചക്കറികളും സ്കൂളിൽ കൃഷിചെയ്യുന്നു. ഈ വർഷത്തെ കൃഷി ആരംഭിക്കാനുള്ള ഒരുക്കങ്ങൾ തുടങ്ങിക്കഴിഞ്ഞു. കുട്ടികൾക്ക് ഭക്ഷണം കഴിക്കുന്നതിനുള്ള സ്റ്റീൽ പ്ലേറ്റും ഗ്ലാസും സ്കൂൾ വക നൽകാൻ തീരുമാനിക്കുകയായിരുന്നുവെന്ന് ചൊവ്വ എഡ്യൂക്കേഷൻ സൊസൈറ്റി പ്രസിഡന്റ്‌ ടി കെ ജയരാമനും സ്കൂൾ മാനേജർ പി കെ ബാലകൃഷ്ണനും പറഞ്ഞു. ഭക്ഷണം സർക്കാർ ഫണ്ടിൽ സർക്കാർ അനുവദിക്കുന്ന ഫണ്ട് മാത്രമാണ് ഉച്ചഭക്ഷണത്തിനായി ചെലവഴിക്കുന്നത്. ആദ്യമാസത്തെ ചെലവിനായി കണ്ടെത്തേണ്ടി വരുന്ന തുക അടുത്ത മാസത്തിൽ തന്നെ സർക്കാരിൽനിന്ന് ലഭിക്കുന്നുമുണ്ട്. മറിച്ചുള്ള പ്രചാരണങ്ങൾ വസ്തുതാവിരുദ്ധമാണ്. പി ശ്രീജ, പ്രധാനാധ്യാപിക