എടക്കാട് എന്നും 
ഇടതിനൊപ്പം

കണ്ണൂർ

വികസനത്തിന്റെ അഞ്ച് സുവർണ വർഷങ്ങൾ ജനങ്ങൾക്ക് സമ്മാനിക്കാനായതിന്റെ ആത്മവിശ്വാസത്തിലാണ് എൽഡിഎഫ് എടക്കാട്‌ ബ്ലോക്ക്‌ പഞ്ചായത്തിൽ ജനവിധി തേടുന്നത്‌. പദ്ധതി നിർവഹണത്തിൽ നൂറ്‌ ശതമാനം സാധ്യമാക്കി ജില്ലയിൽ ഒന്നാം സ്ഥാനവും സംസ്ഥാന തലത്തിൽ മൂന്നാം സ്ഥാനവും നേടി. ജില്ലയിൽ ചികിത്സയ്ക്കായി ഏറ്റവും കൂടുതൽ രോഗികളെത്തുന്ന ഇരിവേരി കമ്യൂണിറ്റി ഹെൽത്ത് സെന്റർ അത്യന്താധുനിക സൗകര്യങ്ങടെയുള്ള നാല്‌ നില കെട്ടിടം പൂർത്തിയായി. അതിദരിദ്രരില്ലാത്ത സംസ്ഥാനത്തെ ആദ്യ ബ്ലോക്ക് പഞ്ചായത്തായി എടക്കാട് ബ്ലോക്ക് മാറി. 52 ലക്ഷം രൂപ ചെലവിൽ പട്ടികജാതി വിഭാഗങ്ങളിലെ കുട്ടികൾക്കായി 26 പഠനമുറികൾ ഒരുക്കി. ലൈഫ് ഭവന നിർമാണ പദ്ധതികൾക്കായി 2.91 കോടി രൂപ ചെലവഴിച്ചു. ജില്ലയിലെ ഏറ്റവും വലിയ മാലിന്യ സംസ്കരണകേന്ദ്രം പെരളശേരിയിൽ സ്ഥാപിച്ചു. സംസ്ഥാന സർക്കാരും ബ്ലോക്ക് പഞ്ചായത്തും നടപ്പാക്കിയ വികസനം ചൂണ്ടിക്കാട്ടിയാണ് എൽഡിഎഫ് വോട്ടർമാരെ സമീപിക്കുന്നത്. തങ്ങളെ ചേർത്തുപിടിക്കുന്നത് ഇടതുപക്ഷം മാത്രമാണെന്ന് സ്വന്തം അനുഭവങ്ങളിലൂടെ ജനങ്ങളും തിരിച്ചറിയുന്നു. തളിപ്പറമ്പ്, കണ്ണൂർ, ധർമടം നിയമസഭാ മണ്ഡലങ്ങളിലായി സ്ഥിതിചെയ്യുന്ന കൊളച്ചേരി, മുണ്ടേരി, ചെമ്പിലോട്, പെരളശേരി, കടമ്പൂർ പഞ്ചായത്തുകൾ അടങ്ങുന്നതാണ് എടക്കാട് ബ്ലോക്ക് പഞ്ചായത്ത്. മുണ്ടേരി, ചെമ്പിലോട്, പെരളശേരി പഞ്ചായത്തുകൾ എൽഡിഎഫും, കൊളച്ചേരി, കടമ്പൂർ പഞ്ചായത്തുകൾ യുഡിഎഫും ഭരിക്കുന്നു. പാവങ്ങളുടെ പടത്തലവൻ എ കെ ജിയുടെ ജന്മദേശമായ പെരളശേരിയും ഗാന്ധിജിയുടെ കേരള സന്ദർശനവേളയിൽ സ്വർണാഭരണങ്ങൾ ഊരിനൽകിയ കൗമുദി ടീച്ചറുടെ നാടായ കാടാച്ചിറയും എടക്കാട് ബ്ലോക്ക് പഞ്ചായത്തിലാണ്. നിലവിൽ വന്ന കാലം മുതൽ എടക്കാട് ബ്ലോക്ക് പഞ്ചായത്ത് ഭരണം എൽഡിഎഫിനൊപ്പമാണ്. വിജയം ഇക്കുറിയും എൽഡിഎഫിന്‌ തന്നെയെന്ന്‌ സ്ഥാനാർഥികളുടെ തെരഞ്ഞെടുപ്പ് പ്രചാരണ യോഗങ്ങളിലെ ജനപങ്കാളിത്തവും ഉറപ്പിക്കുന്നു. വാർഡ് വിഭജനത്തിന്റെ ഭാഗമായി ഇത്തവണ ഒരു ഡിവിഷൻ വർധിച്ച് 14 ഡിവിഷനായി. ​കക്ഷിനില എൽഡിഎഫ്‌ – 7 യുഡിഎഫ്‌ –6