ഇത്‌ മീങ്കുഴിയുടെ
കുടിവെള്ളപ്പെരുമ

പയ്യന്നൂർ

കാൽനൂറ്റാണ്ടായി ഏത്‌ കൊടുംവേനലിലും കുടിവെള്ളവുമായി ഒരു ടാങ്കർലോറിയും കടന്നുവരാത്തൊരു നാടുണ്ട്‌, കാനായി മീങ്കുഴി. 2000 –-2001 ജനകീയാസൂത്രണ പദ്ധതിയിൽ ഉൾപ്പെടുത്തി നിർമാണം ആരംഭിച്ച്‌ 2004ൽ പ്രവർത്തനം തുടങ്ങിയ കാനായി മീങ്കുഴി ശുദ്ധജല വിതരണ പദ്ധതിയാണ്‌ ഇന്നും ഈ നാടിന്റെ ജലസ്രോതസ്‌. ജനകീയ കമ്മിറ്റി നിർമാണം ഏറ്റെടുത്ത പദ്ധതിയിൽ പൈപ്പ്‌ ലൈനാകട്ടെ നാട്ടുകാർ ശ്രമദാനത്തിലൂടെയാണ് നിർവഹിച്ചത്. സി കെ രാമൻ സൗജന്യമായി നൽകിയ സ്ഥലത്താണ്‌ ടാങ്ക്. പട്ടികജാതി ഫണ്ട് ഉപയോഗിച്ച് പ്രദേശത്തെ അമ്പതോളം കുടുംബങ്ങൾക്ക് പ്രയോജനം ലഭിക്കുംവിധമാണ് കുടിവെള്ള വിതരണം. നിലവിൽ ഇരുനൂറിനടുത്ത്‌ കുടുംബങ്ങളിലെ 1500 ഓളം പേർക്ക് കുടിവെള്ളം ലഭ്യമാക്കുന്നു. വീടുകളിൽ വാട്ടർ മീറ്റർ സ്ഥാപിച്ചാണ് ചാർജ് ഈടാക്കുന്നത്. 5000 ലിറ്ററിന് പ്രതിമാസം 30 രൂപ (ഒരു ദിവസം ഒരു രൂപ) മാത്രമാണ് നൽകേണ്ടി വരുന്നത്. ജനകീയ കമ്മിറ്റി ഒരാളെ മീറ്റർ പരിശോധിക്കാനും ചാർജ് പിരിക്കാനും ചുമതലപ്പെടുത്തിയിട്ടുണ്ട്. ജില്ലയിൽ ഏറ്റവും വിജയകരമായ ശുദ്ധജല വിതരണ പദ്ധതിയാണിത്. തറനിരപ്പിൽ ടാങ്ക് സ്ഥാപിച്ചതിനാൽ മറ്റ് കുന്നുകളിലേക്ക് വിതരണം ബുദ്ധിമുട്ടാണ്‌. ഇതിന്‌ തൂണുകൾ സ്ഥാപിച്ച് പുതിയ ടാങ്ക് നിർമിക്കണമെന്ന് ആവശ്യപ്പെട്ട് എംഎൽഎയ്‌ക്കും നഗരസഭയ്‌ക്കും അപേക്ഷ നൽകിയിട്ടുണ്ട്. സൂരജ്കുമാർ ചെയർമാനും പി വി സന്തോഷ് കൺവീനറുമായ ഒമ്പതംഗ കമ്മിറ്റിയാണ് പ്രവർത്തനങ്ങൾക്ക് നേതൃത്വം നൽകുന്നത്.