ക്യാമ്പസിലെ മാറുന്ന ഫാഷൻ ട്രെൻഡുകൾ

കൊച്ചി

മാറുന്ന ഫാഷൻ ട്രെൻഡുകൾ ആദ്യമേറ്റെടുക്കുക ക്യാമ്പസുകളായിരിക്കും. പഠനത്തിനൊപ്പം ഫാഷനുംകൂടി ചേർന്നാലെ വൈബ്‌ സെറ്റാകൂവെന്ന്‌ വിദ്യാർഥികൾ. സമൂഹമാധ്യമങ്ങളും സിനിമയും വെബ് സിരീസുകളും ഇൻഫ്ലുവൻസർമാരുമൊക്കെയാണ്‌ ഫാഷനിൽ ക്യാന്പസിനെ സ്വാധീനിക്കുന്നത്‌. ഓവർസൈസ്ഡ് ടി-ഷർട്ടുകൾ, ബോക്സി ഷർട്ടുകൾ, വൈഡ്-ലെഗ് ജീൻസ്, ബാഗി പാന്റുകൾ, സ്പോർട്സ് ജേഴ്സികൾ എന്നിവയ്ക്കാണ്‌ കൂടുതൽ സ്വീകാര്യത. പുതിയ തലമുറയുടെ ഫാഷൻ സങ്കൽപ്പങ്ങളിൽ പഴയ കാലത്തിന്റെ സ്വാധീനവും കടന്നുവരുന്നുണ്ട്‌.

​പരമ്പരാഗത ആൺ–പെൺ വസ്ത്രധാരണ രീതികളിലെ അതിരുകൾ മങ്ങുന്നു എന്നതാണ് പ്രധാന മാറ്റം. ലൂസ് ഫിറ്റ് ഷർട്ടും ഓവർസൈസ്ഡ് ടി-ഷർട്ടും ബാഗി ജീൻസും ബൂട്ട്കട്ട് പാന്റുകളും ജെൻഡർ ന്യൂട്രൽ വേഷമാണ്‌. സ്വന്തം സൗകര്യത്തിനും ഇഷ്ടത്തിനുമാണ് ജെന്‍ സികള്‍ മുൻതൂക്കം നല്‍കുന്നത്.

​വിന്റേജ്, വൈ ടു കെ ഫാഷൻ

പഴയകാല ജീൻസ്, ഗ്രാഫിക് ടി-ഷർട്ടുകൾ, ഡെനിം ജാക്കറ്റുകൾ, സ്പോർട്സ് ജേഴ്സികൾ തുടങ്ങിയവ പുതിയ രീതിയിൽ അവതരിപ്പിക്കപ്പെടുന്നു. പഴയതും പുതിയതുമായ ഫാഷൻ ശൈലികൾ കൂട്ടിച്ചേർക്കുന്ന പരീക്ഷണങ്ങളും കാണാം.

​വിലയിലും ശ്രദ്ധ

ട്രെൻഡ് പിന്തുടരുമ്പോഴും വസ്ത്രങ്ങളുടെ വിലയും ജെന്‍ സി പ്രധാനമായി പരിഗണിക്കുന്നു. ഒരേ വസ്ത്രം വ്യത്യസ്തരീതിയിൽ സ്റ്റൈൽ ചെയ്യുക, ബജറ്റ് ഫ്രണ്ട്‌ലി ബ്രാൻഡുകൾ തെരഞ്ഞെടുക്കുക, പഴയ വസ്ത്രങ്ങൾ പുതിയരീതിയിൽ ഉപയോഗിക്കുക തുടങ്ങിയ രീതികളും കാണാം.