കോർപറേഷനിൽ ലീഗിന്റെ 
ഒരു സീറ്റുകൂടി കോൺഗ്രസ് പിടിച്ചെടുത്തു

​

കണ്ണൂർ

കോർപറേഷനിൽ സീറ്റ് കൂടുതൽ ചോദിച്ച ലീഗിന് നിലവിലുള്ളതും പോയി. 18 സീറ്റിൽ മത്സരിക്കുന്നതായി പ്രഖ്യാപിച്ച ലീഗിന്റെ കൈയിൽനിന്ന് ഒരു സീറ്റുകൂടി കോൺഗ്രസ് പിടിച്ചു. ലീഗ് സ്ഥാനാർഥിയെ പ്രഖ്യാപിച്ച താഴെചൊവ്വയിലാണ് കോൺഗ്രസ് മത്സരിക്കുന്നത്. കഴിഞ്ഞ തെരഞ്ഞെടുപ്പിലെ സീറ്റ് ധാരണ തുടരാനായിരുന്നു കോൺഗ്രസ് തീരുമാനം. കോർപറേഷനിൽ ഒരു ഡിവിഷൻ കൂടിയതും നേരത്തേ കൈയിലുണ്ടായിരുന്ന സീറ്റ് കോൺഗ്രസ് കൈവശപ്പെടുത്തിയതും മുൻനിർത്തി ലീഗ് രണ്ട് സീറ്റ് കൂടുതൽ ആവശ്യപ്പെട്ടു. എന്നാൽ, വിട്ടുകൊടുക്കേണ്ടെന്ന നിലപാടിലായിരുന്നു കോൺഗ്രസ്. ഏറെ ദിവസം നീണ്ട തർക്കം ഇറങ്ങിപ്പോക്കിലും യുഡിഎഫ് യോഗം ബഹിഷ്കരിക്കുന്നതിലുമെത്തി. ഒടുവിൽ ലീഗ് ആവശ്യപ്പെട്ട വാരം നൽകാനും പകരം വലിയന്നൂർ കോൺഗ്രസിന് കൈമാറാനും ധാരണയായി. ഇതോടെ ലീഗിന്റെ സീറ്റുകൾ കഴിഞ്ഞ തവണത്തെ എണ്ണം തന്നെയായി. ഇതനുസരിച്ച് വാരത്ത് കെ പി താഹിറും താഴെചൊവ്വയിൽ പി കൗലത്തും ഉൾപ്പെടുന്ന സ്ഥാനാർഥിപ്പട്ടിക ലീഗ് ജില്ലാ പ്രസിഡന്റ്‌ അബ്ദുൾകരീം ചേലേരി പ്രഖ്യാപിച്ചു. ലീഗ് പ്രവർത്തകർ സമൂഹ മാധ്യമങ്ങളിലൂടെ പ്രചാരണവും തുടങ്ങിയിരുന്നു. പത്രിക സമർപ്പിച്ചതോടെയാണ് താഴെചൊവ്വ ഡിവിഷനിൽ കോൺഗ്രസും മത്സരിക്കുന്നത് പുറത്തുവന്നത്. സ്വതന്ത്രയായാണ് കോൺഗ്രസ് സോജത്തിനെ സ്ഥാനാർഥിയായി പത്രിക നൽകിയത്. നേതാക്കളല്ലാതെ ലീഗ് പ്രവർത്തകർ സീറ്റ് കൈമാറിയ കാര്യം അറിഞ്ഞിരുന്നില്ല. പത്രിക പിൻവലിക്കുന്ന ദിവസമായ തിങ്കളാഴ്ച കൗലത്തിനെ ലീഗ് നേതാക്കൾ നിർബന്ധിച്ച് പിൻവലിപ്പിക്കുകയായിരുന്നു. ഫലത്തിൽ ലീഗിന് കോർപറേഷനിൽ 17 സീറ്റായി ചുരുങ്ങി. കോൺഗ്രസിന് വഴങ്ങി സീറ്റ് നഷ്ടപ്പെടുത്തിയ ലീഗ് നേതൃത്വത്തിനെതിരെ പ്രവർത്തകർ കലാപം തുടങ്ങിയിട്ടുണ്ട്. കഴിഞ്ഞ തെരഞ്ഞെടുപ്പിൽ ലീഗിന് സീറ്റ് നൽകിയിട്ടും ഏണി ചിഹ്നത്തിൽ മത്സരിക്കാൻ കോൺഗ്രസ് സമ്മതിച്ചിരുന്നില്ല. കോൺഗ്രസ് നിർദേശിച്ചയാളെയാണ് സ്ഥാനാർഥിയാക്കിയതും. സ്വതന്ത്രയായാണ് കഴിഞ്ഞ തവണ ലീഗ് സ്ഥാനാർഥി മത്സരിച്ചത്. ഇത്തവണ ലീഗിന് സീറ്റുതന്നെ നഷ്ടപ്പെട്ടു.