തോട്ടടയിലുമുണ്ട്‌ കോർപറേഷന്റെ തുരുന്പെടുക്കുന്ന മാലിന്യസംസ്‌കരണ പ്ലാന്റ്‌

തോട്ടട

സമാജ് വാദി ഉന്നതിയിലെ മലിനജല സംസ്കരണ പ്ലാന്റിന്റെ പണി പൂർത്തിയാക്കി മാസങ്ങൾ കഴിഞ്ഞിട്ടും ഉദ്ഘാടനം ചെയ്യാനോ പ്രവർത്തിപ്പിക്കാനോ താൽപര്യമില്ലാതെ കണ്ണൂർ കോർപറേഷൻ. ഏറെ കൊട്ടിഘോഷിച്ച് ലക്ഷങ്ങൾ മുടക്കിയ പദ്ധതിയാണ് ആർക്കും ഉപകരിക്കാതെ നശിക്കുന്നത്. തോട്ടട ഡിവിഷനിലെ തൊണ്ണൂറോളം കുടുംബങ്ങൾ താമസിക്കുന്ന സമാജ് വാദി ഉന്നതിയിൽ മലിനജല സംസ്കരണ പ്ലാന്റ്‌ സ്ഥാപിക്കാൻ കണ്ണൂർ കോർപ്പറേഷൻ യുഡിഎഫ് ഭരണസമിതി തീരുമാനിച്ചത് 2021ലാണ്. 50 ലക്ഷം രൂപ ചെലവിൽ ദിവസം 35,000 ലിറ്റർ മലിനജലം സംസ്കരിക്കാൻശേഷിയുള്ള പ്ലാന്റ്‌ നിർമ്മിക്കാൻ കരാറും നൽകി. കരാർ വ്യവസ്ഥപ്രകാരം പ്ലാന്റ്‌ നിർമാണ കാലാവധി ഒരു വർഷമായിരുന്നെങ്കിലും പ്രവൃത്തി പൂർത്തിയാക്കാനെടുത്തത് രണ്ടര വർഷം. പ്രവർത്തിപ്പിക്കാൻ മലിനീകരണ നിയന്ത്രണ ബോർഡിന്റെ അനുമതിയും ലഭിച്ചു. പക്ഷേ, പ്ലാന്റ്‌ പ്രവർത്തിപ്പിക്കാനുള്ള നടപടി കടലാസിൽ ഒതുങ്ങി. മറ്റ് സംവിധാനങ്ങൾ ഇല്ലാത്തതിനാൽ തൊണ്ണൂറോളം കുടുംബങ്ങൾ താമസിക്കുന്ന വീടുകളിൽനിന്നുള്ള മലിനജലം തുറസ്സായ സ്ഥലത്തേക്ക് ഒഴുകാനും കെട്ടിക്കിടന്ന് കൊതുകുകൾ പെരുകാനും രോഗങ്ങൾ പടരാനും കാരണമായി. ​ സ്ഥലം എംഎൽഎയും മന്ത്രിയുമായ രാമചന്ദ്രൻ കടന്നപ്പള്ളിയുടെ മുൻകൈയിൽ സമാജ് വാദി ഉന്നതിയിലെ കുടുംബങ്ങളെ മാറ്റിപാർപ്പിക്കുന്നതിന് കെട്ടിടവും അനുബന്ധ സംവിധാനവും ഒരുക്കാൻ ഇടതുപക്ഷ സർക്കാർ ഏഴുകോടി രൂപ അനുവദിച്ചപ്പോഴും അഭയനികേതന്റെ സ്ഥലം വിട്ടുകൊടുക്കാതെ സർക്കാർ പദ്ധതി എങ്ങനെ അട്ടിമറിക്കാമെന്ന ആലോചനയിലാണ് കോർപറേഷൻ ഭരിക്കുന്ന യുഡിഎഫ് ഭരണസമിതി.