സൗകര്യങ്ങൾ ഉണ്ടായിട്ടെന്ത്‌, 
ചികിത്സ കിട്ടേണ്ടേ

തോട്ടട

എംപ്ലോയീസ് സ്റ്റേറ്റ് ഇൻഷുറൻസ് പദ്ധതിയിൽപ്പെട്ട അംഗങ്ങളുടെയും ആശ്രിതരുടെയും ചികിത്സയ്‌ക്കായുള്ള തോട്ടടയിലെ ആശുപത്രിയിലേക്ക്‌ ഗുണഭോക്താക്കൾ എത്താത്തതിന്‌ പല കാരണങ്ങളുണ്ട്‌. മതിയായ ചികിത്സ ലഭിക്കുന്നില്ലെന്നതുമുതൽ വിദഗ്‌ധ ചികിത്സയ്‌ക്കായി മറ്റു ജില്ലകളിലെ സ്വകാര്യ ആശുപത്രികളിലേക്ക്‌ പോകേണ്ടി വരുന്നുവെന്നതടക്കമാണ്‌ പരാതികൾ. എം പാനൽ ചെയ്ത കണ്ണൂരിലെ ആശുപത്രികൾ പലതും യഥാസമയം പണം ലഭിക്കാത്തതിനാൽ തുടർ ചികിത്സ അവസാനിപ്പിച്ചു. പല ചികിത്സകൾക്കും ഇഎസ്ഐ നിശ്ചയിച്ച നിരക്ക് കുറവാണെന്നതും ആശുപത്രികളുടെ പിൻമാറ്റത്തിന്‌ കാരണമായി. നിലവിൽ കണ്ണൂരിലെ ഒന്നോ, രണ്ടോ ആശുപത്രികൾ മാത്രമാണ്‌ എം പാനൽ പട്ടികയിലുള്ളത്‌. അതുപോലും എല്ലാ വിഭാഗവുമില്ല. സ്‌പെഷ്യാലിറ്റി, സൂപ്പർ സ്‌പെഷ്യാലിറ്റി ചികിത്സകൾക്ക്‌ സ്വകാര്യ ആശുപത്രികളിലെ ഭീമമായ ചെലവ്‌ സാധാരണ തൊഴിലാളികൾക്ക്‌ താങ്ങാൻ കഴിയുന്നതല്ല. നിലവിലുള്ള സൗകര്യങ്ങൾ പരമാവധി ഉപയോഗപ്പെടുത്തി സ്‌പെഷ്യാലിറ്റി, സൂപ്പർ സ്‌പെഷ്യാലിറ്റി ചികിത്സകൾ തോട്ടട ഇഎസ്‌ഐ ആശുപത്രിയിൽതന്നെ ഒരുക്കിയാൽ തൊഴിലാളികൾക്ക്‌ ഏറെ ആശ്വാസമാകും. ഫാർമസിസ്റ്റ്, ലാബ് ടെക്‌നീഷ്യൻ എന്നിവർ അവധിയിൽ പോകുമ്പോൾ പകരക്കാരില്ലാത്തതിനാൽ രോഗികൾക്ക്‌ ഒന്നിലേറെ തവണ ആശുപത്രിയിലേക്ക്‌ വരേണ്ട സ്ഥിതിയുണ്ട്‌. തൊഴിലാളി സംഘടനാ പ്രതിനിധികൾ, തൊഴിലുടമകളുടെ പ്രതിനിധികൾ, പെൻഷൻകാരുടെ പ്രതിനിധികൾ, ആശുപത്രി സൂപ്രണ്ട്, ഇഎസ്ഐ ബ്രാഞ്ച് മാനേജർ എന്നിവർ അംഗങ്ങളായുള്ള ആശുപത്രി വികസന സമിതി നിലവിലുണ്ടെങ്കിലും അടിസ്ഥാനപരമായ പ്രശ്നങ്ങളൊന്നും പരിഹരിക്കപ്പെടുന്നില്ല. എംഎൽഎമാരെ ഉൾപ്പെടുത്തിക്കൊണ്ട്‌ മാനേജിങ് കമ്മിറ്റി രൂപീകരിക്കുകയാണെങ്കിൽ ആശുപത്രി പ്രവർത്തനം മെച്ചപ്പെടുത്താനകുമെന്നാണ്‌ തൊഴിലാളി സംഘടനകൾ പറയുന്നത്‌. പാരാമെഡിക്കൽ ജീവനക്കാർ അവധിയിൽ പോകുമ്പോൾ താൽക്കാലിക ജീവനക്കാരെ നിയമിക്കാൻ കഴിയണം. ഇവരുടെ സേവനം നേരത്തെ പരമാവധി ഒരു വർഷമെന്നതായിരുന്നു. പിന്നീട് ഇത്‌ ആറുമാസമാക്കി. ഇത്‌ പലപ്പോഴും ഉദ്യോഗാർഥികളെ ലഭിക്കുന്നതിന് പ്രയാസം ഉണ്ടാക്കുന്നുണ്ട്. ഇത് പരിഹരിക്കാൻ നടപടിയുണ്ടാകണമെന്ന്‌ ആശുപത്രി അധികൃതരും പറയുന്നു. നിർമാണം പൂർത്തിയായ ഐസിയുവും ഓപ്പറേഷൻ തിയറ്ററും രോഗികൾക്കായി തുറന്നുകൊടുത്താൽ കുറേയെറെ പ്രശ്‌നങ്ങൾക്ക്‌ പരിഹാരമാകും. നിലവിലുള്ള നിയമമനുസരിച്ച്‌ ഇഎസ്‌ഐ ഗുണഭോക്താക്കൾക്ക്‌ മാത്രമാണ്‌ ഇവിടെ ചികിത്സ. ആശുപത്രിയുടെ ചുറ്റുമുള്ള വാർഡുകളിലുള്ള താമസക്കാർക്ക് കൂടി പ്രാഥമിക ചികിത്സയെങ്കിലും നൽകാൻ കഴിഞ്ഞാൽ സമീപവാസികൾക്കും ഇതിന്റെ ഗുണം ലഭിക്കും. നാട്ടുകാർക്കു നമ്മുടേത്‌ കൂടിയാണീ സ്ഥാപനമെന്ന ചിന്തയുണ്ടാക്കാനും ഇത്‌ വഴിയൊരുക്കും. ഇതിനാവശ്യമായ നിയമനിർമാണം നടത്തണമെന്നും നാട്ടുകാർ പറയുന്നു. (അവസാനിച്ചു).