ഡിവൈഡറും സൂചനാ ബോർഡുകളും സ്ഥാപിച്ചുതുടങ്ങി

പാപ്പിനിശേരി

ഗതാഗത പരിഷ്കാരം വിജയകരമായ വളപട്ടണം പാലം- –- പഴയങ്ങാടി റോഡിൽ സ്ഥിരം സൂചനാ ബോർഡുകളും ഡിവൈഡറുകളും സ്ഥാപിച്ചുതുടങ്ങി. ട്രാഫിക് പരിഷ്‌കരണം വിജയകരമാണെന്ന് പാപ്പിനിശേരി പഞ്ചായത്തിൽ കെ വി സുമേഷ് എംഎൽഎയുടെ നേതൃത്വത്തിൽ ചേർന്ന വിവിധ വകുപ്പുകളുടെ എൻജിനിയറിങ് വിഭാഗം വിലയിരുത്തി. റോഡുകളിൽ സ്ഥിരം ഡിവൈഡറുകളും സൂചനാ ബോർഡുകളും റിഫ്ലക്ടറുകളും സ്ഥാപിക്കുന്ന പ്രവൃത്തി തുടങ്ങി. കെഎസ്ടിപി റോഡിൽ കടവത്ത് വയൽ ജങ്‌ഷൻമുതൽ കെസിസിപിഎൽ പെട്രോൾ പമ്പ് മുൻവശം വരെയുള്ള ഭാഗം പഴയങ്ങാടിയിലേക്കുള്ള വാഹനങ്ങൾക്കായി ഇരുവശങ്ങളിലും വീതി കൂട്ടാൻ പിഡബ്ല്യുഡി റോഡ്സിനെയും കെഎസ്ടിപി റോഡ്സിനെയും ചുമതലപ്പെടുത്തി. കോട്ടൺസ് റോഡിൽ വലിയ ചരക്ക് വാഹനങ്ങൾ ദിവസങ്ങളോളം നിർത്തിയിടുന്നത് ഗതാഗത തടസ്സമുണ്ടാക്കുന്നതിനാൽ ഇത് ഒഴിവാക്കാൻ തീരുമാനിച്ചു. വലിയ വാഹനങ്ങൾ ചരക്ക് ഇറക്കിപ്പോകണമെന്നാണ്‌ നിർദേശം. റോഡരികിൽ കെഎസ്ഇബി ഇറക്കിയ ഇലക്ട്രിക് പോസ്റ്റുകൾ മാറ്റാനും തീരുമാനിച്ചു. കെ വി സുമേഷ് എംഎൽഎ, പാപ്പിനിശേരി പഞ്ചായത്ത് പ്രസിഡന്റ് എ വി സുശീല, വൈസ് പ്രസിഡന്റ് പ്രദീപ്കുമാർ, എസ്ഐ പി ഉണ്ണിക്കൃഷ്ണൻ, എൻഎച്ച്എഐ സൈറ്റ് എൻജിനിയർ ഹർകേഷ്, എൻഎച്ച് ലൈസൻ ഓഫീസർ കെ വി അബ്ദുള്ള, പിഡബ്ല്യുഡി റോഡ്സ് അസിസ്റ്റന്റ് എക്സിക്യൂട്ടീവ് എൻജിനിയർ രാം കിഷോർ തുടങ്ങിയവർ പങ്കെടുത്തു.