ഒളിച്ചിരുന്നത് 
കാടുമൂടിയ 
പ്രദേശത്ത്

കണ്ണൂർ

കണ്ണൂർ സെൻട്രൽ ജയിലിൽനിന്ന്‌ ചാടി ഒളിച്ചിരിക്കാൻ സ്ഥലം തേടിയലഞ്ഞ ​ഗോവിന്ദച്ചാമി ഒടുവിലെത്തിയത് തളാപ്പ് എൽഐസി ഓഫീസിന് പിറകിലുള്ള കാടുമൂടിയ പ്രദേശത്ത്‌. ന​ഗരത്തിന്റെ ഹൃദയഭാ​ഗമാണെങ്കിലും ​ആൾതാമസം കുറവാണ്. സിപിഐ എം ഏരിയാ കമ്മിറ്റി ഓഫീസ്, നെഹ്റു യുവകേന്ദ്ര ഓഫീസ്, നാഷണൽ സ്റ്റാറ്റിറ്റിക്സ് ഓഫീസ് എന്നിവയാണ് ഈ ഭാ​ഗത്ത് പ്രവർത്തിക്കുന്നത്. ഈ സ്ഥലത്തിന്റെ മറ്റൊരു ഭാ​ഗത്തുള്ള സ്വകാര്യവ്യക്തിയുടെ സ്ഥലം മുഴുവൻ കാടുമൂടിയ നിലയിലാണ്. സമീപത്ത് വർഷങ്ങളായി അടച്ചിട്ട രാജേശ്വരി ആശുപത്രിയുടെ കെട്ടിടവുമുണ്ട്. കാടുമൂടി വഴിയുൾപ്പെടെ തടസ്സപ്പെട്ടതിനാൽ ഏറെ ബുദ്ധിമുട്ടിവേണം ഇതിലൂടെ അകത്തേക്ക് കടക്കാൻ. ഇഴജന്തുക്കളുടെ ശല്യവുമുണ്ട്. പെട്ടെന്ന് ആർക്കും കടന്നുചെല്ലാൻ സാധിക്കാത്ത ഒരു പ്രദേശമായതിനാൽ സുരക്ഷിതാമാണെന്ന് കരുതിയായിരിക്കാം ​ഗോവിന്ദച്ചാമി ഇവിടെ ഒളിച്ചിരുന്നത്. ഈ ഭാ​ഗങ്ങളിൽ സാമൂഹ്യവിരുദ്ധർ രാത്രികാലങ്ങളിൽ എത്താറുണ്ടെന്നാണ് പൊലീസ് നി​ഗമനം. മദ്യകുപ്പികളും ല​ഹരി വസ്തുക്കളുടെ അവശിഷ്ടങ്ങളും ഇവിടെ പലയിടങ്ങളിലുണ്ട്.