മാട്ടൂലും മാറും

മാട്ടൂൽ

മാട്ടൂൽ, മാടായി പഞ്ചായത്തുകൾ പൂർണമായും ഉൾപ്പെടുന്ന ജില്ലാ പഞ്ചായത്ത്‌ ഡിവിഷനാണ്‌ മാട്ടൂൽ. ജില്ലാ പഞ്ചായത്ത്‌ ഏറ്റെടുത്ത്‌ നടത്തിയ വികസന പ്രവർത്തനങ്ങൾ മാട്ടൂലിൽ എത്രത്തോളം ഫലപ്രദമായി എന്ന ചർച്ചയാണ്‌ ഡിവിഷനിൽ ഇത്തവണ തെരഞ്ഞെടുപ്പ്‌ ചർച്ചയിൽ പ്രധാനം. നാട് വികസിക്കാൻ എൽഡിഎഫ് ജയിക്കണം എന്ന വാദത്തിന്‌ ഉദാഹരണം നിരത്തിയാണ്‌ ഡിവിഷനിലെ എൽഡിഎഫ്‌ സ്ഥാനാർഥി നിസാർ വായിപ്പറമ്പ് വോട്ടർമാരെ കാണുന്നത്‌. ‘‘ജില്ല പഞ്ചായത്ത്‌ ഭരണസാരഥ്യം എൽഡിഎഫിന്‌ ഉറപ്പാണ്‌ എന്നത്‌ എല്ലാവർക്കുമറിയാം. അതിനോട്‌ ചേർന്നുള്ള മുന്നേറ്റം നടത്താൻ നമ്മളും തയ്യാറാകണം. വികസന കാര്യത്തിൽ നാടിനെ പൂർണമായും അവഗണിക്കുന്ന ഇടപെടലായിരുന്നു ഇതുവരെ യുഡിഎഫ് പ്രതിനിധികളായി ജില്ലാ പഞ്ചായത്തിലേക്ക് പോയവർ സ്വീകരിച്ചത്. അത് ഇത്തവണ മാറും; മാറണം’’ – സ്ഥാനാർഥിയും അദ്ദേഹത്തെ കേൾക്കുന്നവരും പങ്കിടുന്ന വികാരമാണിത്‌. മാട്ടൂൽ, മാടായി പഞ്ചായത്തുകളുടെ കെടുകാര്യസ്ഥതയിൽ വലഞ്ഞ പ്രദേശങ്ങളാണ്‌ ഡിവിഷനിൽ അധികവും. അതിന്‌ മാറ്റമുണ്ടാകുമെന്ന ഉറപ്പ്‌ സ്വീകരണ കേന്ദ്രങ്ങളിൽ പ്രകടം. മാട്ടൂൽ ,മാടായി പഞ്ചായത്തുകൾ പൂർണമായും ചെറുകുന്നിലെ രണ്ട് വാർഡും ഏഴോത്തെ ആറ് വാർഡും ചെറുതാഴത്തെ ഒരു വാർഡും ഉൾപ്പെടുന്നതാണ് ജില്ലാ പഞ്ചായത്ത് മാട്ടൂൽ ഡിവിഷൻ. മാട്ടൂൽ, മാടായി പഞ്ചായത്തുകളിൽ ഏഴ് വാർഡുകളിൽ എൽഡിഎഫ്‌ കഴിഞ്ഞതവണ ജയിച്ചു. പല വാർഡുകളും അഞ്ചിൽ താഴെ വോട്ടിനാണ്‌ നഷ്ടപ്പെട്ടതും. മാട്ടൂൽ ഡിവിഷനിൽ ഉൾപ്പെട്ട മറ്റ് പ്രദേശങ്ങളായ ഏഴോം, ചെറുതാഴം, ചെറുകുന്ന് പഞ്ചായത്ത് പരിധിയിലുള്ള വാർഡുകളിലും എൽഡിഎഫ് സ്ഥാനാർഥികളാണ് മുന്പ്‌ ജയിച്ചത്. മാട്ടൂൽ സൗത്ത് മേഖലയിലെ വ്യാപാര, വാണിജ്യ സ്ഥാപനങ്ങളിൽ സ്ഥാനാർഥി നിസാർ വായിപ്പറമ്പ് വോട്ടഭ്യർഥിച്ചു. പഞ്ചായത്ത് സ്ഥാനാർഥികളായ എ ഹബീബ്, പി ടി സുരേഷ് ബാബു, കക്കിച്ചി മുസ്തഫ ഹാജി എന്നിവരും എൽഡിഎഫ്‌ നേതാക്കളായ പി വി പ്രദീപൻ, പി വി ബാബു രാജേന്ദ്രൻ, കെ ഭാർഗവൻ, സി പ്രകാശൻ, പി വി ജിതേഷ്, കെ സന്തോഷ്, സി മധു, കെ സുജിത്ത് കുമാർ എന്നിവരും സ്ഥാനാർഥിക്കൊപ്പമുണ്ടായി.