പ്രായം വെറും അക്കം എൺപതിൽ ഏഴാം ഭൂഖണ്ഡത്തിലേക്ക് ഡോ. നാരായണൻ

മട്ടന്നൂർ പ്രായമാകുമ്പോൾ വീടിന്റെ നാല്​ ചുവരുകൾക്കുള്ളിൽ സുരക്ഷിതത്വം തേടുന്ന മനുഷ്യർക്ക് മുന്നിൽ. ഡോ. നാരായണൻ പുതുശേരി വേറിട്ട ചരിത്രമാണ്​ സൃഷ്ടിക്കുന്നത്​. മട്ടന്നൂർ ഗാന്ധി റോഡ്​ മിഥിലയിലെ എൺപതിലേക്ക്​ കടക്കുന്ന ഡോ. നാരായണൻ പുതുശ്ശേരി ലോകത്തിലെ ആറ്​ ഭൂഖണ്ഡങ്ങളിൽ ഇതിനകം യാത്രചെയ്തുകഴിഞ്ഞു. ഏഴാമത്തെ ഭൂഖണ്ഡമായ ഓസ്​ട്രേലിയയിലേക്ക് യാത്രതിരിക്കുകയാണ്‌. ന്യൂസിലൻഡും സന്ദർശിക്കും. വരുന്ന വ്യാഴം രാത്രി നെടുമ്പാശ്ശേരി വിമാനത്തവളത്തിൽനിന്ന്​ പറന്നുയരുമ്പോൾ പ്രായം വെറും ഒരു അക്കം മാത്രമാണെന്ന യാഥാർഥ്യമാകും അദ്ദേഹം ലോകത്തോട്​ വിളിച്ചുപറയുന്നത്​. നേവിയിൽനിന്ന്​ മാർഷൽചീഫ്​ പെറ്റി ഓഫീസറായി വിരമിച്ച അദ്ദേഹം ഇതിനകം 47 രാജ്യങ്ങൾ സന്ദർശിച്ചുകഴിഞ്ഞു. ഏഴാമത്തെ വൻകരയുടെ സന്ദർശനത്തോടെ 49 രാജ്യങ്ങളിലെ സന്ദർശനം പൂർത്തിയാകും. 50 രാജ്യങ്ങളെങ്കിലും സന്ദർശിക്കണമെന്ന മോഹമാണ്​ ഈ എൺപതുകാരന്‌. കുട്ടിക്കാലം മുതൽ യാത്രയോടുള്ള പ്രണയം ആവേശംക്കെടാതെ പ്രായത്തെ തോൽപ്പിച്ചും തുടരുകയാണ്. മട്ടന്നൂർ ശിവപുരം യുപി സ്കൂളിൽ ഏഴാംക്ലാസിൽ പഠിക്കുമ്പോൾ സമ്മാനമായി കിട്ടിയ എസ് ​കെ പൊറ്റെക്കാട്ടിന്റെ ‘പാതിരാസൂര്യന്റെ നാട്ടിൽ’ എന്ന ഫിൻലൻഡിനെക്കുറിച്ചുള്ള യാത്രാനുഭവങ്ങൾ പങ്കുവയ്‌ക്കുന്ന പുസ്തകം വായിച്ചതോടെയാണ്​ യാത്രകളോട്​ അദ്ദേഹത്തിന്​ പ്രത്യേക ഇഷ്ടം തോന്നാനിടയാക്കിയത്​. പിന്നീട്​ ഫിൻലൻഡിൽ പോകാനും കഴിഞ്ഞു. 1970ൽ കശ്മീരിൽ ഒറ്റക്ക്​ യാത്രചെയ്തു. ശ്രീലങ്ക, മാലിദ്വീപ്​, മൗറീഷ്യസ്​ എന്നിവിടങ്ങളിൽ ഡ്യൂട്ടിയുടെ ഭാഗമായി പാസ്​പോർട്ടില്ലാതെ യാത്രചെയ്തു. നേപ്പാൾ, ബൂട്ടാൻ എന്നീ രാജ്യങ്ങളും സന്ദർശിച്ചു. നേപ്പാൾവഴി കൈലാസയാത്ര നടത്തി. 2008ൽ തായ്​വാനിൽ ജൈവ കൃഷിയെക്കുറിച്ചുള്ള ഒരു സെമിനാറിൽ സംബന്ധിക്കാനായി. തായ്​ലൻഡ്​, കം​ബോഡിയ, വിയറ്റ്​നാം എന്നിവിടങ്ങളും സന്ദർശിച്ചു. 2018ൽ യൂറോപ്പിൽ 10 രാജ്യങ്ങളാണ്​ സന്ദർശിച്ചത്​. 2019ൽ ഐക്യരാഷ്ട്രസഭയിൽ സുസ്ഥിര വികസനം എന്ന വിഷയത്തിൽ പങ്കെടുക്കാൻ അമേരിക്കയിലെത്തി. 2022ൽ സൗത്ത്​ അമേരിക്കയിൽ. അന്റാർട്ടിക്ക വൻകരയിൽ പോയെങ്കിലും ഇറങ്ങാൻ അനുമതിയുണ്ടായിരുന്നില്ല. അതുകാരണം ചുറ്റുമുള്ള അയലൻഡ്‌​ വഴി 14 ദിവസം കപ്പലിൽ യാത്രചെയ്തു. ഈ വർഷവും അമേരിക്ക, കാനഡ, അലാസ്ക എന്നിവിടങ്ങളിൽ യാത്ര നടത്തി. 1964ലാണ്‌ നേവിയിൽ ജോലിയിൽ പ്രവേശിക്കുന്നത്‌. പുണെ ലോനാവ്​ലയിലെ മറൈൻ എൻജിനിയറിങ്​ കോളേജിൽ അഞ്ചുവർഷത്തെ തീവ്രപരിശീലനത്തിനുശേഷം 1968ൽ ഫെബ്രുവരിയിൽ ഐഎൻഎസ്​ കഠാർ കപ്പലിൽ നിയമനം. അതിനിടെ 1965ലെ ഇന്ത്യ -പാക്കിസ്ഥാൻ യുദ്ധത്തിലും പ​ങ്കെടുത്തു.