സാംസ്‌കാരിക പ്രവർത്തകര്‍ പ്രതിഷേധിച്ചു

തൃശൂർ

സാഹിത്യ അക്കാദമിക്ക്‌ അനുവദിക്കേണ്ട ഫണ്ട്‌ വെട്ടിക്കുറച്ച സർക്കാർ നടപടിക്കെതിരെ പുരോഗമന കലാസാഹിത്യ സംഘം ജില്ലാ കമ്മിറ്റി നേതൃത്വത്തിൽ പ്രകടനവും പ്രതിഷേധ സദസ്സും സംഘടിപ്പിച്ചു. സാഹിത്യ അക്കാദമിയിലും മറ്റ് അക്കാദമികളിലും ശമ്പളംപോലും ലഭിക്കാത്ത സ്ഥിതിയാണ്‌. പുസ്തകോത്സവം, അന്താരാഷ്ട്ര സാഹിത്യോത്സവം എന്നിങ്ങനെ അതിപ്രധാന പരിപാടികളെപ്പോലും ബാധിക്കുന്ന വിധത്തിൽ വലിയ തോതിൽ ഫണ്ട് സർക്കാർ വെട്ടിക്കുറച്ചു. കെഎസ്ടിഎ ഹാൾ പരിസരത്തുനിന്ന് പ്രകടനം ആരംഭിച്ചു. സാഹിത്യ അക്കാദമി ഹാളിനുമുന്നിൽ ചേർന്ന പ്രതിഷേധ സദസ്സ്‌ പുരോഗമന കലാസാഹിത്യ സംഘം സംസ്ഥാന വൈസ്‌പ്രസിഡന്റ്‌ അശോകൻ ചരുവിൽ ഉദ്‌ഘാടനം ചെയ്‌തു. ജില്ലാ പ്രസിഡന്റ്‌ അഡ്വ. വി ഡി പ്രേമപ്രസാദ്‌ അധ്യക്ഷനായി. സംസ്ഥാന സെക്രട്ടറി സി രാവുണ്ണി, ജില്ലാ സെക്രട്ടറി എം എൻ വിനയകുമാർ, എൻ രാജൻ, സി എഫ്‌ ജോൺ ജോഫി, കെ രമ, ഡോ. കെ ജി വിശ്വനാഥൻ എന്നിവർ സംസാരിച്ചു. പി ഡി പ‍ൗലോസ്‌ ഗാനമാലപിച്ചു.