2 മലയാളികൾക്ക്​ അന്താരാഷ്ട്ര അംഗീകാരം

തൃശൂർ

കേരളത്തിലെ അപൂർവ വലച്ചിറകൻ (ഷഡ്​പദ) ജീവികളുടെ ഗവേഷണത്തിൽ രണ്ട്​ മലയാളി ഗവേഷകർക്ക്​ അന്താരാഷ്​ട്ര അംഗീകാരം. ഇരിങ്ങാലക്കുട ക്രൈസ്റ്റ് കോളേജിലെ ഡോ. സി ബിജോയ്, ടി ബി സൂര്യനാരായണൻ എന്നിവരാണ്​ ചൈനയിലെ ബീ​ജിങ്ങിൽ നടന്ന 15-–ാമത് ഇന്റർനാഷണൽ സിമ്പോസിയം ഓഫ് ന്യൂറോപ്റ്ററോളജിയിൽ പ്രബന്ധങ്ങൾ അവതരിപ്പിച്ചത്​. ലോകത്തിന്റെ വിവിധ ഭാഗങ്ങളിൽ നിന്നുള്ള ന‍‍ൂറോളം ശാസ്ത്രജ്ഞർ പങ്കെടുത്ത സമ്മേളനത്തിൽ ഇന്ത്യയിൽ നിന്ന്​ ഇരുവരും മാത്രമാണ്​ ഉണ്ടായിരുന്നത്. ടി ബി സൂര്യനാരായണൻ ഇരിങ്ങാലക്കുട ക്രൈസ്റ്റ് കോളേജിലെ ഷഡ്പദ എന്റമോളജി റിസർച്ച് ലാബിലെ ഗവേഷകനും എൽത്തുരുത്ത് സെന്റ് അലോഷ്യസ് കോളേജിലെ അസി. പ്രൊഫസറുമാണ്​. സിമ്പോസിയത്തിൽ മുഖ്യപ്രഭാഷകനായിരുന്നു അദ്ദേഹം. ‘ഇന്ത്യയിലെ വലച്ചിറകൻ ശ്രേണിയിലെ പഠനനില’ എന്ന വിഷയത്തിൽ പ്രഭാഷണം നടത്തി. ഇന്ത്യയിലെ വലച്ചിറകൻ ജീവികളുടെ വൈവിധ്യം, ഗവേഷണ പുരോഗതി, സംരക്ഷണ വെല്ലുവിളികൾ എന്നിവയെ കുറിച്ച്​ വിശദീകരിച്ചു. തൃശൂർ മുളങ്കുന്നത്തുകാവ് സ്വദേശിയാണ് ടി ബി സൂര്യനാരായണൻ. ഡോ. സി ബിജോയ്, എസ്ഇആർഎൽ ലാബ് മേധാവിയും ക്രൈസ്റ്റ് കോളേജിലെ അസി. പ്രൊഫസറുമാണ്​. കേരളത്തിലെ ‘ഓൾഫ്ലൈസ് എന്ന വലച്ചിറകൻ വിഭാഗത്തിന്റെ ആവാസവും ഉയരപരമായ മുൻഗണനകളും’ എന്ന വിഷയത്തിലാണ്​ പ്രബന്ധം അവതരിപ്പിച്ചത്​. കേരളത്തിലെ അപൂർവ വലച്ചിറകൻ വിഭാഗത്തിൽപ്പെടുന്ന ജീവികളുടെ വിതരണം, പരിസ്ഥിതി അനുയോജ്യത തുടങ്ങിയവയെക്കുറിച്ചുള്ള പ്രധാന വിവരങ്ങൾ പ്രബന്ധത്തിലൂടെ ലഭിച്ചു. പാലക്കാട് പുതുനഗരം സ്വദേശിയാണ് ഡോ. സി ബിജോയ്.