ഫാസിസ്റ്റ് ഭീഷണിക്കുമുന്നിൽ പതറില്ല: പിണറായി

തിരുവനന്തപുരം

ഫാസിസ്റ്റ് ഭീഷണിക്കുമുന്നിൽ ജനകീയ പ്രക്ഷോഭങ്ങൾ പതറില്ലെന്നും ജനാധിപത്യ സംരക്ഷണത്തിനുള്ള പോരാട്ടങ്ങൾ അതിശക്തമായി തുടരുമെന്നും പ്രതിപക്ഷ നേതാവ്‌ പിണറായി വിജയൻ‍. ലോകത്തിനുമുന്നിൽ തലയുയർത്തിനിന്ന ഇന്ത്യൻ ജനാധിപത്യത്തെ കശാപ്പ് ചെയ്യുകയാണ് മോദി സർക്കാർ. നേതാക്കളെ അടിച്ചമർത്തി സമരം പൊളിക്കാമെന്ന കേന്ദ്രത്തിന്റെ അഹങ്കാരം തെരുവിൽ തകർന്നടിഞ്ഞെന്നും അദ്ദേഹം പറഞ്ഞു. ഡൽഹിയിൽനിന്ന്‌ തിരിച്ചെത്തി സിപിഐ എം ജില്ലാ കമ്മിറ്റിയുടെ നേതൃത്വത്തിൽ സ്വീകരണം ഏറ്റുവാങ്ങിയശേഷം എ കെ ജി സെന്ററിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.

പ്രതിഷേധിക്കാനുള്ള ജനങ്ങളുടെ അവകാശം തടയാൻ സർക്കാരിന് അധികാരമില്ലെന്ന് സുപ്രീംകോടതി ഉത്തരവിട്ടതാണ്. അമ്പതിലധികം മെട്രോ സ്റ്റേഷനുകൾ അടച്ചുപൂട്ടി ജനങ്ങളുടെ സഞ്ചാരസ്വാതന്ത്ര്യം തടഞ്ഞതിനെതിരെ സിപിഐ എം ജനറൽ സെക്രട്ടറി എം എ ബേബി കോടതിയെ സമീപിച്ചപ്പോഴാണ് സുപ്രീംകോടതി ഇടപെടൽ. സുപ്രീംകോടതി ഉത്തരവിനുപോലും വിലകൽപ്പിക്കാത്ത ഏകാധിപത്യ സമീപനമാണ് മോദി സർക്കാരിന്റേത്. ഡൽഹി നഗരത്തിൽ സൈന്യത്തെയും അർധസൈനിക വിഭാഗങ്ങളെയും പതിനായിരക്കണക്കിന് പോലീസുകാരെ അണിനിരത്തി. ജന്തർമന്തറിൽ ഒരു പ്രക്ഷോഭകനും കടക്കരുതെന്ന നിലപാടാണ് കേന്ദ്രം സ്വീകരിച്ചത്. ഭരണഘടനാവിരുദ്ധമായ ഈ ധിക്കാരത്തെ ചോദ്യം ചെയ്യാൻ ഞങ്ങൾ തീരുമാനിക്കുകയായിരുന്നു– പിണറായി പറഞ്ഞു.