കടലിൽ കുടുങ്ങിയ 
മത്സ്യത്തൊഴിലാളികളെ രക്ഷിച്ചു

കൊടുങ്ങല്ലൂർ

പ്രൊപ്പല്ലറിൽ വല കുരുങ്ങി എൻജിൻ നിലച്ച് കടലില്‍ ഒഴുകി നടന്ന ബോട്ടിലെ 26 മത്സ്യത്തൊഴിലാളികളെ ഫിഷറീസ് -മറൈൻ എൻഫോഴ്​സ്​മെന്റ്​ റെസ്ക്യൂ സംഘം രക്ഷിച്ചു. കൊച്ചിൻ ഹാർബറിൽനിന്ന്​ വെള്ളിയാഴ്ച പുലർച്ചെ മത്സ്യബന്ധനത്തിന് പോയ ‘റഹ്‌മ' എന്ന ബോട്ടാണ് അപകടത്തിൽപെട്ടത്. കൊച്ചി സ്വദേശികളാണ്​ മത്സ്യത്തൊഴിലാളികൾ. ശക്തമായ കാറ്റും മഴയും ക‍ൂറ്റൻ തിരമാലകളും മറികടന്നാണ്​ ഫിഷറീസ് വകുപ്പിന്റെ റെസ്ക്യൂ സംഘം തൊഴിലാളികളെയും ബോട്ടും കരയിലെത്തിച്ചത്​. കയ്പമംഗലത്ത്​നിന്ന്​ 10 നോട്ടിക്കല്‍ മൈല്‍ അകലെ വഞ്ചിപ്പുര വടക്ക് -പടിഞ്ഞാറ് ഭാഗത്താണ് ബോട്ട് അപകടത്തിൽ പെട്ടത്. വെള്ളി രാത്രി 7.35നാണ്​ ബോട്ടും തൊഴിലാളികളും കടലില്‍ കുടുങ്ങിക്കിടക്കുന്നതായി അഴീക്കോട് ഫിഷറീസ് സ്റ്റേഷനിൽ സന്ദേശം ലഭിച്ചത്​. മറൈൻ എൻഫോഴ്​സ്​മെന്റ്​ ആൻഡ്​ വിജിലൻസ് വിങ് ഓഫീസർമാരായ വി എം ഷൈബു, വി എൻ പ്രശാന്ത്കുമാർ, ഇ ആർ ഷിനിൽകുമാർ, സീ റസ്‌ക്യൂ ഗാര്‍ഡുമാരായ കൃഷ്ണപ്രസാദ്, സുധീഷ്, ബോട്ട് സ്രാങ്ക് ദേവസി, എൻജിൻ ഡ്രൈവർ ഫെലിക്സ് എന്നിവർ രക്ഷാപ്രവര്‍ത്തനത്തിന് നേതൃത്വം നല്‍കി.