അതിരപ്പിള്ളിയിലെ കാട്ടാന കാടുകയറി

ചാലക്കുടി

അതിരപ്പിള്ളി വനമേഖലയിലെ മസ്തകത്തിൽ മുറിവേറ്റ നിലയിൽ കണ്ടെത്തിയ കാട്ടാനയെ മയക്കുവെടി വയ്ക്കാനുള്ള ശ്രമം നടന്നില്ല. വെറ്റിലപ്പാറ രണ്ടാം ബ്ലോക്കിൽ കണ്ട ആനയെ മയക്കുവെടി വയ്ക്കാൻ ചീഫ് വെറ്ററിനറി സർജൻ അരുൺ സക്കറിയയുടെ നേതൃത്വത്തിലാണ്‌ ശ്രമം നടത്തിയത്‌. കൂടുതൽ വ്യക്തതയുള്ള ഭാഗത്തേക്ക് മാറ്റാനായി റബർ ബുള്ളറ്റുകളുപയോഗിച്ച് നിറയൊഴിച്ചു. ശബ്ദം കേട്ട് ആന തൊട്ടടുത്തുള്ള തുരുത്തിലേക്ക് ഓടികയറി. ഇതോടെ മയക്കുവെടി വയ്ക്കാനുള്ള നീക്കം പാളി. തുരുത്തിൽ നിന്ന്‌ പുറത്തിറങ്ങുന്നത് കാത്ത് ദൗത്യസംഘം ഉച്ചവരെ കാത്ത് നിന്നെങ്കിലും പുറത്തിറങ്ങിയില്ല. ശബ്ദം കേട്ട് പരിഭ്രമിച്ച ഒറ്റയാൻ പിന്നീട് കാട്ടിലേക്ക് കയറിപോയി. കാടിറങ്ങാതെ ആനയെ വെടിവയ്ക്കാനാകില്ല. വൈകിട്ട്‌ നാലുകഴിഞ്ഞാൽ ഇരുട്ട് പരക്കുമെന്നതിനാൽ അതിന് മുമ്പ് വെടിവച്ച് ചികിത്സ നൽകാനായിരുന്നു പദ്ധതി. മൂന്നര കഴിഞ്ഞിട്ടും ആനയെ കണ്ടെത്താനാകാതെ വന്നതോടെ സംഘം മടങ്ങി. ദൗത്യം വ്യാഴാഴ്ചയും തുടരും. കണ്ടെത്താൻ 
ഡ്രോൺ നിരീക്ഷണം ആനയെ കണ്ടെത്താൻ മലയാറ്റൂർ ഡിഎഫ്ഒ കുറ ശ്രീനിവാസിന്റെ നേതൃത്വത്തിലുള്ള സംഘം ഡ്രോൺ പറത്തി നിരീക്ഷണം ആരംഭിച്ചിട്ടുണ്ട്. വനത്തിന്റെ ഉയരം കൂടിയ എലിച്ചാനി ഭാഗത്താണ് ഡ്രോൺ നിരീക്ഷണം നടക്കുന്നത്. ആനയുടെ സാന്നിധ്യം ഉറപ്പാക്കി വ്യാഴം രാവിലെ മയക്കുവെടി വയ്ക്കാനാണ് തീരുമാനം. ഇതിന് പുറമേ വനംവകുപ്പിന്റെ നാല് സംഘങ്ങളും നിരീക്ഷണത്തിനായി പ്രദേശത്തുണ്ട്. നിലവിൽ കുങ്കി ആനകളുടെ ആവശ്യമില്ലെന്നും ആവശ്യം വരികയാണെങ്കിൽ എത്തിക്കുമെന്നും വാഴച്ചാൽ ഡിഎഫ്ഒ ആർ ലക്ഷ്മി പറഞ്ഞു. ആനയുടെ മുറിവിൽ പഴുപ്പുണ്ടെന്ന വാർത്ത സ്ഥിരീകരിക്കാനായിട്ടില്ല. വാടാമുറിയിലും പറയൻപാറയിലും സമീപത്തെ തുരുത്തിലുമാണ് ആന മാറി മാറി നിന്നിരുന്നത്. ബുധനാഴ്ചയും തീറ്റയെടുക്കൽ അധികം നടന്നിട്ടില്ല. എന്നാൽ ആന ക്ഷീണിതനല്ലെന്ന നിഗമനത്തിലാണ് വനപാലകർ. അസിസ്‌റ്റന്റ്‌ ഫോറസ്‌റ്റ്‌ വെറ്ററിനറി ഓഫീസർമാരായ ഡോ. ബിനോയ് സി ബാബു, ഡോ. ഒ വി മിഥുൻ, പാലക്കാട് വെറ്ററിനറി ഓഫീസർ ഡോ. ഡേവിഡ് എന്നിവരും സ്ഥലത്തുണ്ട്‌. അതിരപ്പിള്ളി റേഞ്ച് ഫോറസ്റ്റ് ഓഫീസർ ജീഷ്മ ജനാർദനൻ, ഡെപ്യൂട്ടി റേഞ്ച് ഫോറസ്റ്റ് ഓഫീസർ പി കെ ശിവരാമൻ, സെക്‌ഷൻ ഫോറസ്റ്റുമാരായ പി എ അജേഷ്, സി എസ് സനിൽകുമാർ, എച്ച് നൗഷാദ്, ആഷിക് ബി വർഗീസ് കോശി, പി എം സുധീർ എന്നിവരും നിരീക്ഷണ സംഘത്തിലുണ്ട്.