​-‘ചുവപ്പുകടൽ’ ആശങ്കവേണ്ട;
കാരണം ‘നോക്ടിലുക’

തൃശൂർ

കടലിൽ ചുവപ്പുനിറം കണ്ടതിൽ ആശങ്കപ്പെടേണ്ടതില്ലെന്ന് കേരള ഫിഷറീസ് ആൻഡ്​ ഓഷ്യൻ സ്റ്റഡീസ് സർവകലാശാല അധികൃതർ അറിയിച്ചു. ‘നോക്ടിലുക’ എന്ന സൂക്ഷ്​മ സസ്യ​ സാന്നിധ്യമാണ് ചുവപ്പ് നിറത്തിന്​ കാരണം. ഇവയുടെ എണ്ണം വർധിക്കുമ്പോൾ കടൽ ചുവപ്പായി തോന്നുകയാണെന്നും കുഫോസ് അധികൃതർ അറിയിച്ചു. തൃശൂർ ജില്ലയിലെ എടക്കഴിയൂർ ബീച്ച്​ എറണാകുളം ജില്ലയിലെ പുതുവൈപ്പ് (വളപ്പ്) ബീച്ചുവരെ അടുത്ത ദിവസങ്ങളിൽ കടലിന്റെ നിറത്തിൽ വലിയ വ്യത്യാസം കാണപ്പെട്ടതായി നാട്ടുകാർ ശ്രദ്ധിച്ചു. പ്രത്യേകിച്ചും പുതുവൈപ്പ് ബീച്ചിൽ കടൽത്തീരത്തോട് ചേർന്ന് തിരമാലകൾ ചുവന്ന നിറത്തിൽ പ്രത്യക്ഷപ്പെട്ടത് ആശങ്കയ്ക്ക് ഇടയാക്കി. ഇതേ തുടർന്ന്​ കുഫോസ് നടത്തിയ ജല സാമ്പിള്‍ പരിശോധനയിൽ നോട്ടിലൂക്ക എന്ന ഡയാനോഫ്​ളാജോലൈറ്റ്​ വിഭാഗത്തിൽ സൂക്ഷ്മ സസ്യം (പ്ലവഗങ്ങൾ) വളരെ കൂടുതലായി കണ്ടെത്തി. "റെഡ് ടൈഡ്‌" എന്നറിയപ്പെടുന്ന പ്രകൃതിദത്തമായ സംഭവമാണിത്​. സാധാരണയായി സമുദ്രജലത്തിൽ ഉണ്ടാകാറുള്ള സൂക്ഷ്മജീവിയാണിത്​. ചില സാഹചര്യങ്ങളിൽ​ അതിന്റെ എണ്ണം വർധിക്കും. പിന്നീട്​ കൂട്ടത്തോടെ നശിക്കും. ഇതോടെ ഓക്​സിജൻ, മത്സ്യലഭ്യത എന്നിവ കുറയും. ഇത്​ പ്രാദേശിക മത്സ്യത്തൊഴിലാളികൾ ശരിവച്ചു. മത്സ്യത്തൊഴിലാളികൾ ഈ പ്ലവഗങ്ങളെ "പോള" എന്നാണ്​ വിളിക്കുന്നത്. വിശദമായ വിവര ശേഖരണത്തിന്​ ഇൻകോയിസുമായി ബന്ധപ്പെട്ടു. എന്നാൽ, മേഘാവൃതമായ കാലാവസ്ഥയാൽ ഉപഗ്രഹസഹായം ഉപയോഗിച്ചുള്ള ഡാറ്റ ശേഖരണം കഠിനമായതിനാൽ കൂടുതൽ വിവരങ്ങൾ ലഭ്യമായില്ല. ഇതിനു പിന്നിലുള്ള പരിസ്ഥിതി ഘടകങ്ങൾ വ്യക്തമാക്കുന്നതിനായി കുഫോസിന്റെ ഗവേഷകസംഘം വിശദമായ പരിശോധന തുടരുകയാണ്.