മാൻ സഫാരി പാർക്ക്​ ഒരുങ്ങുന്നു

തൃശൂർ

പുത്തൂർ സുവോളജിക്കൽ പാർക്കിൽ മാൻ സഫാരി പാർക്കും വരുന്നു. ഇതിന്റെ നിർമാണോദ്​ഘാടനം ഞായർ രാവിലെ ഒമ്പതിന്​ മന്ത്രി കെ രാജൻ നിർവഹിക്കും. തൃശൂർ മൃഗശാലയിലെ മൃഗങ്ങളെ സുവോളജിക്കൽ പാർക്കിലേക്ക് മാറ്റുന്ന നടപടികളും ഇന്ത്യയിലെ മറ്റു സംസ്ഥാനങ്ങളിൽനിന്നും വിദേശത്തുനിന്നും ഉൾപ്പെടെ കൂടുതൽ മൃഗങ്ങളെ എത്തിക്കുന്ന നടപടികളും അതിവേഗം പുരോഗമിക്കുകയാണ്​. സുവോളജിക്കൽ പാർക്ക് കൂടുതൽ സന്ദർശക സൗഹൃദമാക്കുന്നതിനായി പല നൂതന പദ്ധതികളും ആവിഷ്​കരിച്ചിട്ടുണ്ട്​. പാർക്കിലെ മൃഗങ്ങളെ വളരെ അടുത്തുനിന്ന് വീക്ഷിക്കുന്നതിന് സൗകര്യമുണ്ടെങ്കിലും ഇവ വന്യ ജീവികളായതിനാൽ അടുത്തേക്ക് പോകാൻ സാധിക്കുകയില്ല. എന്നാൽ കുട്ടികൾക്കുൾപ്പെടെ അടുത്തുചെന്ന് കാണാൻ പറ്റുന്ന ജീവികളുടെ ഒരു മൃഗശാല ‘പെറ്റ് സൂ' എന്ന പേരിൽ സ്ഥാപിക്കും. ഡിജിറ്റൽ സാങ്കേതിക വിദ്യയുടെ സഹായത്താൽ സന്ദർശകർക്ക് വിവിധ ഭൂഖണ്ഡങ്ങളിലെ വന്യ ജീവികളുടെ കൂടെ സഞ്ചരിക്കുന്ന പ്രതീതി ഉളവാക്കുന്ന ഒരു മായാലോകം ‘വെർച്യുൽ സൂ'വിലൂടെയും ഒരുക്കുന്നുണ്ട്.