എല്‍ഡിഎഫ് പ്രതിഷേധം ഇന്ന്

തൊടുപുഴ

ഖത്തര്‍ എന്ന സ്വതന്ത്ര രാഷ്ട്രത്തെ അകാരണമായി ആക്രമിച്ച്‌ യുദ്ധാന്തരീക്ഷം സൃഷ്‌ടിക്കുന്ന ഇസ്രയേല്‍ നടപടിക്കെതിരെ എല്‍ഡിഎഫ് ജില്ലാ കമ്മിറ്റി ചൊവ്വാ വൈകിട്ട് ധര്‍ണ നടത്തുന്നു. വൈകിട്ട് അഞ്ചിന് മങ്ങാട്ടുകവലയില്‍ എം എം മണി എംഎല്‍എ ഉദ്ഘാടനംചെയ്യും. ഇസ്രയേല്‍ ആക്രമിക്കുന്ന ഏഴാമത്തെ രാജ്യമാണ് ഖത്തര്‍. അമേരിക്കന്‍ പിന്തുണയോടെയും ഇന്ത്യയുടെ മൗനാനുവാദത്തോടെയുമാണ് മറ്റ് രാജ്യങ്ങള്‍ക്കെതിരെ ആക്രമണം അഴിച്ചുവിടുന്നത്. ഗാസയില്‍ പതിനായിരക്കണക്കിന് കുഞ്ഞുങ്ങളെ കൊന്ന് വംശഹത്യ നടത്തുന്ന ഇസ്രയേല്‍ ഏതുരാജ്യത്തിനുമേലും കടന്നുകയറുന്ന സ്ഥിതിയാണുള്ളത്. ക്രൂരമായ ഇസ്രയേല്‍ അധിനിവേശത്തിനെതിരെ ലോകത്തെല്ലായിടത്തും പ്രതിഷേധം ഉയരുകയാണ്. യുദ്ധോപകരണങ്ങള്‍ വിറ്റഴിക്കാനും സാമ്രാജ്യത്വ അധീശത്വം അരക്കിട്ടുറപ്പിക്കാനും അമേരിക്ക യുദ്ധവെറിയന്‍മാര്‍ക്ക്‌ ഊര്‍ജം പകരുന്നു. ലക്ഷക്കണക്കിന്‌ മലയാളികള്‍ അധിവസിക്കുന്ന ഖത്തറിനെതിരായുള്ള ആക്രമണം ഒറ്റപ്പെട്ടതായി കാണാനാവില്ല. അമേരിക്കയും ഇസ്രയേലും നടത്തുന്ന സൈനികാക്രമണങ്ങള്‍ക്കെതിരെ ഇടതുപക്ഷം രാജ്യത്താകെ പ്രക്ഷോഭങ്ങൾ നടത്തുകയാണ്. സിപിഐ എം സംസ്ഥാന കമ്മിറ്റിയംഗം കെ പി മേരി, ജില്ലാ സെക്രട്ടറിയറ്റംഗം മുഹമ്മദ് ഫൈസല്‍, എല്‍ഡിഎഫ് നേതാക്കളായ വി ആര്‍ പ്രമോദ്, ജോസ് പാലത്തിനാല്‍, കെ എം ജബ്ബാർ, അനിൽ കൂവപ്ലാക്കൽ, പോള്‍സണ്‍ മാത്യു, ജോര്‍ജ് അഗസ്റ്റിന്‍ തുടങ്ങിയവര്‍ സംസാരിക്കും.