വട്ടിയൂർക്കാവ് ജങ്ഷൻ വികസനം എൽഡിഎഫ്‌ ഇച്ഛാശക്തിയിൽ

തിരുവനന്തപുരം

വട്ടിയൂർക്കാവ്‌ മണ്ഡലം നിവാസികളുടെ ദീർഘകാല ആവശ്യമായ ‘വട്ടിയ‍ൂർക്കാവ്‌ ജങ്‌ഷൻ വികസനം’ ആരംഭിക്കുന്നത്‌ മുൻ എംഎൽഎ വി കെ പ്രശാന്തിന്റെ ഇച്ഛാശക്തിയിൽ. 2019വരെ എംഎൽഎയായിരുന്ന കെ മുരളീധരൻ പദ്ധതിക്കുവേണ്ടി ഒന്നും ചെയ്‌തില്ല. വി കെ പ്രശാന്ത്‌ വിജയിച്ച്‌ ചുരുങ്ങിയ സമയംകൊണ്ട്‌ പദ്ധതിക്ക്‌ രൂപമാക്കി, സർക്കാരിന്‌ സമർപ്പിച്ച്‌ അനുമതി നേടിയെടുത്തു. ജങ്‌ഷന്റെയും അനുബന്ധ റോഡുകളുടെയും വികസനത്തിന്‌ 531 കോടി രൂപ കിഫ്‌ബിവഴി നേടിയെടുത്തു. കഴിഞ്ഞ ഫെബ്രുവരിയിൽ മുഖ്യമന്ത്രി പിണറായി വിജയൻ വട്ടിയൂർക്കാവ് ജങ്‌ഷൻ, റോഡുകളുടെ വികസനം, വ്യാപാരികളുടെ പുനരധിവാസം എന്നിവ ഉദ്ഘാടനംചെയ്‌തു. പുനരധിവാസം ആവശ്യപ്പെട്ട 58 വ്യാപാരികൾക്കാണ്‌ ബജറ്റ് വഴി അനുവദിച്ച 9.25 കോടി ചെലവിൽ ഷോപ്പിങ്‌ കോംപ്ലക്‌സ്‌ നിർമിക്കുന്നത്‌.