ശാന്തിക്കാരനായെത്തി ക്ഷേത്രത്തിൽ 
മോഷണം; ഒരാൾ അറസ്‌റ്റിൽ

ചിറയിൻകീഴ്

തിരുവനന്തപുരം, കൊല്ലം ജില്ലകളിൽ ക്ഷേത്രങ്ങളിൽ ശാന്തിക്കാരനായി കയറി മോഷണം നടത്തുന്നയാൾ അറസ്റ്റിൽ. തൃശൂർ കണിമംഗലം അയ്യപ്പൻകാവ് റോഡിൽ മാടപ്പറമ്പ് മഠം വീട്ടിൽ വാസുദേവനെ (58)യാണ് ചിറയിൻകീഴ് പൊലീസ് അറസ്റ്റ് ചെയ്തത്. റിമാൻഡ് ചെയ്തു. ആനത്തലവട്ടം പുട്ടുകട ജങ്‌ഷന് സമീപം ഉള്ളാപറമ്പ് ഭഗവതിക്ഷേത്രത്തിൽ ശാന്തിക്കാരനായിരിക്കെ ഇയാൾ വിഗ്രഹത്തിൽ ചാർത്താനുള്ള അരപ്പവന്റെ രണ്ട് മാല കവർന്നു. ഇവ പണയപ്പെടുത്തി പണവുമായി കടന്നു. മറ്റൊരു ക്ഷേത്രത്തിൽ ജോലിക്ക് കയറാൻ ശ്രമിക്കവെയാണ് പിടിയിലായത്. അമ്പലപ്പുഴ, ചാലക്കുടി സ്റ്റേഷനുകളിൽ ഇയാൾക്കെതിരെ കേസുകളുണ്ട്.