മാറുകയാണ്‌ 
 പേരൂർക്കട

തിരുവനന്തപുരം

തലസ്ഥാന നഗരത്തിലേക്കുള്ള പ്രധാന കവാടമാണ്‌ പേരൂർക്കട. ​2000 ൽ ആണ്‌ പേരൂർക്കട വാർഡ്‌ രൂപീകൃതമായത്‌. 2005 മുതൽ എൽഡിഎഫിനൊപ്പമാണ്‌. പേരൂർക്കട വാർഡിന്റെ വികസനം തലസ്ഥാന നഗരത്തിന്റെകൂടി വികസനമാണ്‌. അതിനനുസരിച്ചുള്ള പദ്ധതികളാണ്‌ എൽഡിഎഫ് സർക്കാരും കോർപറേഷൻ ഭരണസമിതിയും വാർഡിലെ ക‍ൗൺസിലർമാരും വിഭാവനം ചെയ്യുന്നത്‌. വികസനത്തുടർച്ചയ്‌ക്ക്‌ ഇത്തവണ എൽഡിഎഫിനായി രംഗത്തിറങ്ങുന്നത്‌ ബാലസംഘം, എസ്‌എഫ്‌ഐ എന്നിവയിലൂടെ വളർന്ന്‌ നാടിന്‌ സുപരിചിതനായ വിനീത്‌ വി ജിയാണ്‌. വാർഡിലെ പുരോഗതിയും ജനകീയ ആവശ്യങ്ങളും മുൻനിർത്തി എല്ലാവരോടും സംവദിച്ചാണ്‌ വിനീതിന്റെ പര്യടനം. ക്ഷേമ പെൻഷൻ ലഭിക്കുന്നവരും ലൈഫ്‌ ഭവന പദ്ധതി ഗുണഭോക്താക്കളും എൽഡിഎഫ്‌ സർക്കാരിന്റെ ഗുണഫലം അനുഭവിക്കുന്നവരും സ്ഥാനാർഥിയെ ഹൃദയത്തോട്‌ ചേർക്കുകയാണ്‌. കുടിവെള്ള പ്രശ്‌നം രൂക്ഷമായിരുന്ന പല പ്രദേശങ്ങളിലും ഇന്ന്‌ വെള്ളം സുലഭമാണ്‌. റോഡുകളും ഇടവഴികളും നവീകരിച്ചും സ്‌ട്രീറ്റ്‌ ലൈറ്റുകൾ സ്ഥാപിച്ചുമെല്ലാം ജനങ്ങളുടെ ആവശ്യങ്ങൾക്ക്‌ ഒപ്പം നിൽക്കുന്നവരാണ്‌ ഇതുവരെ വിജയിച്ച എൽഡിഎഫ്‌ ക‍ൗൺസിലർമാർ. പേരൂർക്കട മത്സ്യ മാർക്കറ്റിന്റെ നവീകരണ പ്രവർത്തനങ്ങൾ പുരോഗമിക്കുകയാണ്‌. പേരൂർക്കട മേൽപ്പാലംകൂടി യാഥാർഥ്യമാകുന്നതോടെ വാർഡിന്റെ മുഖഛായതന്നെ മാറും. അതിനുവേണ്ടി താൻ മുന്നിലുണ്ടാകുമെന്ന്‌ ഉറപ്പുനൽകിയാണ്‌ വിനീത്‌ വി ജി വോട്ടഭ്യർഥിക്കുന്നത്‌.