‘സബിത ഞങ്ങടെ മുത്താ’

തിരുവനന്തപുരം

‘"ഞങ്ങടെ വോട്ടെല്ലാം സബിതയ്ക്ക്‌ തന്നെ... ഏത്‌ പാതിരാത്രിയിലും ഓടി വരാൻ അവളേ ഉള്ളൂ, അവള്‌ ജയിച്ചാൽ ഞങ്ങക്കൊരു ബലമാ.. ’'എൺപതുകാരി ജഗദമ്മ പറഞ്ഞുതുടങ്ങിയപ്പോൾ കണ്ണുകൾ നിറഞ്ഞൊഴുകി. തോർത്തുമുണ്ടുകൊണ്ട്‌ കണ്ണുതുടച്ച്‌ ജഗദമ്മ തുടർന്നു. കുടപ്പനക്കുന്നിലെ ആർവി പുരത്തിന്റെ ഇടവഴികളിലെല്ലാം എൽഡിഎഫ്‌ സ്ഥാനാർഥി സബിതയ്ക്കായുള്ള വോട്ടഭ്യർഥനയുണ്ട്‌. ​ബാലസംഘംമുതൽ ജന്മനാട്ടിൽ പ്രവർത്തിച്ചുതുടങ്ങിയ സബിതയെ എല്ലാവർക്കും അറിയാം. പ്രളയത്തിലും കോവിഡിലും ദുരിതാശ്വാസപ്രവർത്തനങ്ങളിൽ പങ്കാളിയായിരുന്നു. "ഞങ്ങടെ മോള്‌ മത്സരിക്കുന്ന ഇ‍ൗ തെരഞ്ഞെടുപ്പ്‌ ഓണം പോലെയാണ്‌. അവള്‌ ജയിക്കുമ്പോ ഞാൻ ഡാൻസ്‌ കളിക്കും. ഞങ്ങള്‌ പലരും ഉപവാസവും നേർച്ചയും നേർന്ന്‌ കാത്തിരിക്കുവാ.. മോൾടെ പടം അടിച്ച ടീ ഷർട്ട്‌ ആ വീട്ടിലെ പാസ്റ്ററിന്റെ മകൻ ചെയ്തുതരാന്ന്‌ പറഞ്ഞിട്ടുണ്ട്‌', വളരെ നിഷ്‌കളങ്കമായുള്ള സുശീലയുടെ വാക്കിൽ ജാതിമത ചിന്തകൾക്കപ്പുറമുള്ള എൽഡിഎഫ്‌ സ്ഥാനാർഥിയോടുള്ള സ്‌നേഹമാണ്‌. സിപിഐ എം കുടപ്പനക്കുന്ന്‌ ലോക്കൽ കമ്മിറ്റി അംഗംകൂടിയാണ്‌ സബിത. ഡിവൈഎഫ്ഐ മുൻ ജില്ലാ കമ്മിറ്റി അംഗമായിരുന്നു. ഹാർവിപുരം ബ്രാഞ്ച് സെക്രട്ടറി, കെഎസ്‌കെടിയു പേരൂർക്കട ഏരിയ കമ്മിറ്റി അംഗം എന്നീ നിലകളിലും പ്രവർത്തിക്കുന്നു.