റെയിൽവേ സ്‌റ്റേഷനും തെരുവുനായ ഭീഷണിയിൽ

ആലപ്പുഴ

നഗരത്തിന്‌ പുറമേ തെരുവുനായശല്യത്തിൽ വലഞ്ഞ്‌ ആലപ്പുഴ റെയില്‍വേ സ്​റ്റേഷനിൽ എത്തുന്ന യാത്രക്കാരും. പ്ലാറ്റ്​​ഫോമിൽ ഉൾപ്പെടെ തെരുവുനായകൾ ഇടംപിടിച്ചതോടെ ​ഏതുനിമിഷവും കടിയേൽക്കാമെന്ന ആശങ്കയിലാണ്‌ സ്‌റ്റേഷനിലെത്തുന്ന വിദേശ വിനോദസഞ്ചാരികളടക്കമുള്ള യാത്രക്കാർ. പത്തിലധികം നായകൾ വിലസുന്ന സ്‌റ്റേഷനിലെത്തുന്ന ആര്‍ക്കും ഏതുനിമിഷവും കടിയേല്‍ക്കാമെന്ന​ സ്ഥിതിയാണ്‌. എട്ടുമാസത്തിനിടെ നായ്‌ക്കളുടെ ആക്രമണത്തിൽ പരിക്കേറ്റത്‌​ 35 ഓളം പേർക്കാണ്​. രണ്ടാമത്തെ പ്ലാറ്റ്ഫോമിലെ ലിഫ്​റ്റ്​, ഒന്നാമത്തെ പ്ലാറ്റ്ഫോമിലെ എസ്‌കലേറ്റർ എന്നിവിടങ്ങളാണ്‌ നായകളുടെ താവളം. പ്ലാറ്റ്‌ഫോമിലേക്കെത്തുന്ന യാത്രക്കാർക്കും ട്രെയിനിനുംനേരെ നായക്കൂട്ടം പാഞ്ഞടുക്കുന്നുണ്ട്‌. പ്ലാറ്റ്‌ഫോമിലും വിശ്രമമുറികളിലും ടിക്കറ്റ് കൗണ്ടറിലുമടക്കം ശല്യമുണ്ട്​. ട്രെയിനുകളുടെ ഹോണും നായകളെ ആക്രമണകാരികളാക്കുന്നുവെന്ന്‌ സ്ഥിരംയാത്രക്കാർ പറയുന്നു​. പ്ലാറ്റ്ഫോമിലേക്ക് അടുക്കുമ്പോൾ ട്രെയിനിനൊപ്പം നായകൾ കുരച്ചോടുന്നത്‌ വലിയ അപകടങ്ങൾക്ക്‌ കാരണമാകും. ഇവയുടെ ആക്രമണം ഭയന്നാണ്‌ ജീവനക്കാരും ഓരോ ദിവസവും ജോലിക്കെത്തുന്നത്‌​. ട്രെയിൻ കാത്തിരിക്കുമ്പോള്‍ ബെഞ്ചിനടിയിലൂടെ വന്ന്‌ കടിച്ചിട്ടുമുണ്ട്‌. കഴിഞ്ഞയാഴ്‌ച എറണാകുളം-–കായംകുളം പാസഞ്ചറിലെ വനിതാ​ കമ്പാർട്ടുമെന്റിൽ തെരുവുനായ കയറിയത്​ യാത്രക്കാരെ പരിഭ്രാന്തിയിലാക്കി. മാരാരിക്കുളം റെയിൽവേ സ്​റ്റേഷനിൽനിന്ന്​ ടെയിനിൽ കയറിയ നായയെ കലവൂർ റെയിൽവേ സ്​​റ്റേഷൻ എത്തിയപ്പോൾ യാത്രക്കാർ ഓടിച്ചുവിടുകയായിരുന്നു. ഇതിന്റെ വീഡിയോ സമൂഹമാധ്യമത്തിൽ പ്രചരിച്ചിരുന്നു​. ട്രെയിനിൽ തെരുവുനായ കയറിക്കൂടിയത് യാത്രക്കാരുടെ സുരക്ഷയ്‌ക്ക്‌ കനത്ത ഭീഷണിയാണ്‌ ഉയർത്തിയത്‌. സ്‌റ്റേഷനിൽ നായയുടെ കടിയേറ്റാലും പരാതി നല്‍കാമെന്നല്ലാതെ പ്രയോജനമില്ലെന്നും യാത്രക്കാർ പറയുന്നു.