രഞ്‌ജിത്തിന്റെ കുടുംബത്തിന്‌ പൊലീസ്‌ 
പെൻഷൻകാരുടെ സഹായം

ചേർത്തല

ഇരുകാലും മുറിച്ചുനീക്കിയതോടെ കിടപ്പിലായ രഞ്ജിത്തിന്റെ കുടുംബത്തിന് കേരള പൊലീസ് പെൻഷനേഴ്‌സ് അസോസിയേഷൻ ചേർത്തല മേഖല കമ്മിറ്റിയുടെ സഹായഹസ്‌തം. ബസ് ഡ്രൈവറായിരുന്ന ചേർത്തല നഗരസഭ 25–-ാം വാർഡിൽ കുറുപ്പൻകുളങ്ങര ചേപ്പിലപ്പൊഴിയിൽ രഞ്ജിത്തിന്റെ കുടുംബത്തിനാണ് സഹായം എത്തിച്ചത്‌. ​രഞ്ജിത്തിന്റെ ദുരവസ്ഥയും പ്രതികൂല കുടുംബ സാഹചര്യവും അതിജീവിച്ച്‌ മകൾ അനീന എസ്എസ്എൽസി പരീക്ഷയിൽ ഉന്നതവിജയം നേടിയിരുന്നു. കെപിപിഎ ജില്ല പ്രസിഡന്റ്‌ ഐവാൻ രത്തിനത്തിന്റെ നേതൃത്വത്തിൽ ഭാരവാഹികൾ രഞ്ജിത്തിന്റെ വീട്ടിലെത്തി സഹായധനം കൈമാറി. ​എല്ലാ വിഷയങ്ങൾക്കും എ പ്ലസ്‌ നേടിയ മകൾ അനീനയ്‌ക്ക്‌ ജില്ല സെക്രട്ടറി ജി ഹരിദാസ് പഠനോപകരണങ്ങൾ നൽകി. മേഖല പ്രസിഡന്റ്‌ പി കെ റോഷിൻ പൊന്നാട അണിയിച്ചു. സെക്രട്ടറി പി ജോസി സ്‌റ്റീഫൻ, ട്രഷറർ സി ആർ മധു, എസ് മനോജൻ എന്നിവർ സംഘത്തിൽ ഉൾപ്പെട്ടു.