നീലാകാശംനിറഞ്ഞ്​ നവാസ്

ബി സുശിൽ കുമാർ

ആലപ്പുഴ

ഒറ്റസിനിമയിലെ നായകവേഷത്തിലൂടെ സിനിമാപ്രേമികളുടെ ഹൃദയത്തിൽ ഇടംനേടിയ നടനായിരുന്നു അകാലത്തിൽ ഹൃദയാഘാതംമൂലം വിടപറഞ്ഞ കലാഭവൻ നവാസ്. നിരവധി സിനിമകളിൽ ശ്രദ്ധേയവേഷംചെയ്​ത കലാഭവൻ നവാസ് നായകനായി അഭിനയിച്ചത് ഒരേ ഒരു സിനിമയിൽ. ആലപ്പുഴക്കാരനായ എ ആർ കാസിം സംവിധാനംചെയ്​ത്​ ആലപ്പുഴക്കാരിയായ ഉഷ പൂക്കായി നിർമിച്ച് 2001-ൽ തിയറ്ററുകളിൽ എത്തിയ ‘നീലാകാശം നിറയെ’ എന്ന ചിത്രത്തിലാണ്​ നവാസ്​ നായകനായത്​. അതിൽ നായികാവേഷംചെയ്​ത രഹനയാണ് പിന്നീട് കലാഭവൻ നവാസിന്റെ ജീവിതപങ്കാളിയായത്​. നാട്ടിൽ വർഗീയ കലാപം പൊട്ടിപ്പുറപ്പെടുന്ന സമയത്ത്​ വിദേശത്തുനിന്ന്​ നാട്ടിലെത്തുന്ന ഉണ്ണി എന്ന ചെറുപ്പക്കാരൻ ആമിന എന്ന മുസ്​ലിം പെൺകുട്ടിയുമായി പ്രണയത്തിലാകുന്നതും തുടർന്നുള്ള പ്രശ്​നങ്ങളുമാണ്​ സിനിമയുടെ ഇതിവൃത്തം. സിനിമയിൽ കലാഭവൻ നവാസിനെയും രഹനയെയുംകൂടാതെ മുരളി, സായികുമാർ, ക്യാപ്റ്റൻ രാജു, ബാബുനമ്പൂതിരി, ടോണി, അഗസ്റ്റിൻ, ശാലു കൂറ്റനാട്, സീനത്ത്, കണ്ണൂർ ശ്രീലത എന്നിവരും പ്രധാന വേഷങ്ങൾചെയ്യുന്നു. വയലാർ ശരച്ചന്ദ്രവർമ, കൈതപ്രം എന്നിവരുടേതാണ്​​ ഗാനങ്ങൾ. യേശുദാസ്, ചിത്ര, ലാലു ചെറിയാൻ എന്നിവരാണ് പാടിയത്. ആലപ്പി ജിമ്മിയാണ് സംഗീതം. കഥയും തിരക്കഥയും സംഭാഷണവും കലവൂർ രവികുമാറാണ്. ക്യാമറ ജ്യോതികുമാറും പ്രൊഡക്ഷൻ എക്​സിക്യൂട്ടീവ് ആന്റോ ജോസഫും എഡിറ്റിങ്​ രഞ്ജൻ എബ്രഹാമുമാണ്.