ആലപ്പുഴ റെയിൽവേ സ്​റ്റേഷനിലെ മാലിന്യം നീക്കിത്തുടങ്ങി

ആലപ്പുഴ

ആലപ്പുഴ റെയിൽവേ സ്​റ്റേഷനിൽ കുമിഞ്ഞുകൂടിയ മാലിന്യങ്ങൾ കരാർ കമ്പനി ബുധൻ രാവിലെ മുതൽ​ വാഹനത്തിൽ കൊണ്ടുപോയിത്തുടങ്ങി​. ഓട്ടം കഴിഞ്ഞ്​ എത്തുന്ന ട്രെയിനുകൾ വൃത്തിയാക്കാനും അറ്റകുറ്റപ്പണികൾക്കുമായി എത്തിക്കുന്ന പിറ്റ്​ലൈനിന്​ സമീപത്താണ്​ മാലിന്യക്കൂന. ഇതുനീക്കാൻ കരാറെടുത്ത കമ്പനി യഥാസമയം ജോലി ചെയ്യാത്തതിനാലാണ്​ ഭക്ഷണാവശിഷ്​ടമടക്കം അടിഞ്ഞുകൂടി ദുർഗന്ധം പരത്തുന്നത്​. ഇത്​ തെരുവുനായ ശല്യത്തിനും പകർച്ചവ്യാധി ഭീഷണിക്കും ഇടയാക്കിയിരുന്നു. ആലപ്പുഴ റെയിൽവേ സ്​റ്റേഷൻ പരിസരം മാലിന്യകേന്ദ്രമാകുന്നതിനെപ്പറ്റി ‘ദേശാഭിമാനി’ വാർത്ത പ്രസിദ്ധീകരിച്ചിരുന്നു.