അച്ഛനും രണ്ടാനമ്മയും പിടിയിൽ

ആലപ്പുഴ

ആദിക്കാട്ടുകുളങ്ങരയിൽ നാലാംക്ലാസുകാരിയെ മർദിച്ച സംഭവത്തിൽ കുട്ടിയുടെ അച്ഛൻ അൻസർ, രണ്ടാനമ്മ ഷെഫിന എന്നിവർ പിടിയിൽ. വെള്ളി വൈകിട്ട്​ എട്ടിന് ഷെഫിനയെ കൊല്ലം ചക്കുവള്ളിയിൽ നിന്നും 8.30 ന് അച്ഛൻ അൻസറിനെ പത്തനംതിട്ട അടൂരിനടുത്ത്​ കടമാൻകുളത്തുനിന്നാണ്​ ആലപ്പുഴ പൊലീസിന്റെ പ്രത്യേകസംഘം പിടികൂടിയത്​. എസ്​പിയുടെ നിർദേശപ്രകാരം രൂപം നൽകിയ പ്രത്യേക അന്വേഷകസംഘം നിരവധി ടീമുകളായി തിരിഞ്ഞ്​ വെള്ളി രാവിലെ മുതൽ വ്യാപക തെരച്ചിൽ നടത്തുകയായിരുന്നു. പരിചയക്കാർ, അടുത്ത ബന്ധുക്കൾ, ഇരുവരുടെയും രണ്ടുവർഷത്തെ ഫോൺകോൾ വിവരങ്ങൾ എന്നിവയും കുട്ടിയുടെ അച്ഛൻ കഞ്ചാവ്​ ഉപയോഗിച്ചിരുന്നു എന്ന വിവരവും കേന്ദ്രീകരിച്ച് അന്വേഷക സംഘം കെണിയൊരുക്കി. പ്രതികൾ കടമാൻകുളത്തിനടുത്തുണ്ടെന്ന്​ വിവരം ലഭിച്ചതിന തുടർന്ന് പൊലീസ്​ സംഘം എത്തുകയായിരുന്നു. ഇരുവരെയും രാത്രി വൈകി നൂറനാട്​ സ്​റ്റേഷനിൽ എത്തിച്ചു. നാലാംക്ലാസുകാരിയെ മർദിച്ച സംഭവത്തിൽ ബാലാവകാശ കമീഷൻ സ്വമേധയാ കേസെടുത്തു. ജില്ലാ ശിശുക്ഷേമ ഓഫീസറോടും നൂറനാട് എസ്​എച്ച്​ഒയോടും റിപ്പോർട്ട് തേടി. വിശദ അന്വേഷണം നടത്തി ഏഴു ദിവസത്തിനുള്ളിൽ റിപ്പോർട്ട് നൽകാനാണ് നിർദേശം. പെൺകുട്ടിയുടെ മൊഴിയും രേഖപ്പെടുത്തി. കുട്ടിക്ക് എല്ലാ സംരക്ഷണവും ഉറപ്പ് വരുത്തുമെന്ന് ബാലാവകാശകമീഷൻ അറിയിച്ചു. റിപ്പോർട്ട് ലഭിച്ച ശേഷം നടപടി സ്വീകരിക്കും. വെള്ളി രാവിലെ ആലപ്പുഴ ചൈൽഡ്​ വെൽഫെയർ കമ്മിറ്റി ഓഫീസിൽ എത്തിയ പിതാവിന്റെ ഉമ്മയ്ക്ക് കുട്ടിയെ വളർത്താനുള്ള താൽക്കാലിക ചുമതല നൽകി ഉത്തരവ് കൈമാറി. കുഞ്ഞിന്റെ ആവശ്യപ്രകാരമാണ് തീരുമാനം. വ്യാഴാഴ്​ച ചൈൽഡ്​ വെൽഫെയർ കമ്മിറ്റി കുട്ടിയുടെ മൊഴിരേഖപ്പെടുത്തിയിരുന്നു. ഇനി തന്നോട്​ ഇങ്ങനെ ചെയ്യരുതെന്ന്​ അച്ഛന്​ താക്കീത്​ നൽകണമെന്ന്​ കുട്ടി സിഡബ്ല്യുസിക്ക്​ നൽകിയ മൊഴിയിൽ പറയുന്നതായി ചെയർപേഴ്സൺ അഡ്വ. ബി വസന്തകുമാരി അമ്മ പറഞ്ഞു. പിതാവിന്റെ ഉമ്മയുടെ സംരക്ഷണയിൽ ബന്ധുവീട്ടിലാണ്​ കുട്ടി ഇപ്പോൾ.