ആപ്പ് പണിമുടക്കി : 
തൊഴിലുറപ്പ് അവതാളത്തിൽ

മാരാരിക്കുളം

തൊഴിലുറപ്പ് തൊഴിലാളികളുടെ ഹാജർ രേഖപ്പെടുത്തുന്ന ആപ്പ് പണിമുടക്കിയതിനാൽ ജോലി ചെയ്യാനാവാതെ തൊഴിലാളികൾ. എൻഎംഎംഎസ് ആപ്പിലൂടെയാണ് ഹാജർ രേഖപ്പെടുത്തേണ്ടത്. ആഴ്ചയിൽ രണ്ട് തവണ ഹാജർ രേഖപ്പെടുത്തുന്ന ആപ്പ്‌ പുതുക്കുകയാണ്‌. മേറ്റ് മാർ ഇത് കൃത്യമായി നിർവഹിച്ചിട്ടും ഹാജരെടുക്കാൻ പറ്റുന്നില്ല. അവസാനം എൻ എം എം എസ് 2.0 V5.0.1 എന്ന അപ്ഡേഷൻ വന്നപ്പോൾ നിലവിലെ സ്ഥിതി താറുമാറായി. രണ്ട് ദിവസമായി ഹാജർ രേഖപ്പെടുത്താനാകുന്നില്ല. ആപ്പ് ശരിയായാൽ തന്നെ ചിലതൊഴിലാളികളുടെ ഹാജർ എടുക്കാൻ കാമറ കാണിക്കാത്ത സ്ഥിതിയുമുണ്ട്. ​തൊഴിലുറപ്പ് പദ്ധതി പേര് മാറ്റി 125 ദിവസം തൊഴിൽ ഉറപ്പ് വരുത്തി വി ബി - ജി റാം നിലവിൽ വന്നെങ്കിലും തൊഴിലാളികൾക്ക് ജോലിചെയ്യാനോ ഹാജർ രേഖപ്പെടുത്താനോ കഴിയാത്ത അവസ്ഥയാണ്‌. പ്രശ്നത്തിന്‌ ഉടനെ പരിഹാരം കാണണമെന്ന് തൊഴിലുറപ്പ് പദ്ധതി എംപ്ലോയീസ് യൂണിയൻ സിഐടിയു ജില്ലാ പ്രസിഡന്റ് കലാദേവിയും സെക്രട്ടറി കെ ബി ബിനുവും ആവശ്യപ്പെട്ടു.