ചേർത്തുപിടിച്ച 
ജ്യേഷ്​ഠസഹോദരൻ: 
പി കെ മേദിനി

ആലപ്പുഴ

‘ദിവാനെതിരെ പാട്ടുപാടി അറസ്​റ്റ്​ വരിച്ച കുട്ടിയാണിത്’​– എം കെ സാനു മാഷ്​ മറ്റുള്ളവർക്ക്​ തന്നെ പരിചയപ്പെടുത്തിയത്​ അങ്ങനെയായിരുന്നുവെന്ന്​ വിപ്ലവഗായിക പി കെ മേദിനി. ആലപ്പുഴയിൽ മാഷിന്റെ മംഗലത്ത്​ കുടുംബത്തിന്റെ കുടികിടപ്പുകാരായിരുന്നു തന്റെ കുടുംബം. കുടികിടപ്പവകാശം നൽകുന്നതിനെ ആദ്യംഅനുകൂലിച്ച കുടുംബങ്ങളിൽ ഒന്ന്​ മാഷിന്റെതാണ്​. അതിൽ അദ്ദേഹത്തിന്റെയും സ്വാധീനമുണ്ടായിരുന്നു – അസുഖബാധിതയായി വിശ്രമത്തിലായ മേദിനിയുടെ കണ്ണുകൾ നിറഞ്ഞു. എപ്പോൾ കണ്ടാലും സ്​നേഹത്തോടെ പെരുമാറുകയും സംസാരിക്കുകയും ചെയ്യും. പിന്നീട്​ അതൊരു സ‍ൗഹൃദമായി വളർന്നു. ഗൃഹാതുരത്വത്തിൽ അലിഞ്ഞ മനുഷ്യനായി​ തോന്നിയിട്ടുണ്ട്​. കർമമേഖല എറണാകുളത്തേക്ക്​ മാറിയിട്ടും ജന്മനാടും ബന്ധങ്ങളും കൈവിട്ടില്ല​. ഒറ്റയ്​ക്കെന്ന്​ തോന്നിയ നിമിഷങ്ങളിലെല്ലാം കൂടെനിന്നിട്ടുണ്ട്. ​നഷ്​ടമായത്​ ഒരു ജ്യേഷ്​ഠ സഹോദരനെയാണ്​. രണ്ടുമാസം മുമ്പ് വ‍ീട്ടിലേക്ക് ക്ഷണിച്ചിരുന്നു. പോകാൻ ആരോഗ്യം അനുവദിച്ചില്ല. അവസാനമായി കാണണമെന്ന ആഗ്രഹവും നടന്നില്ല. ​തുല്യരായി പരിഗണിച്ച്​ അടിസ്ഥാനവിഭാഗത്തെ ചേർത്തുനിർത്തുകയും​ അവർക്കായി ശബ്​ദമുയർത്തുകയും ചെയ്​തു. വിദ്യാഭ്യാസവും വായനയും ലോകപരിചയവും കടുത്ത പ്രതിസന്ധികളിലൂടെ കടന്നുപോയ ബാല്യവുമെല്ലാം കാലത്തിന്​ മുന്നേ നടക്കാൻ മാഷിന്​ കരുത്തായി​ – മേദിനി പറഞ്ഞു.