വൈറ്റില ഹബ്ബിലേക്കുള്ള 
യാത്ര ദുഷ്‌കരം

വൈറ്റില

വൈറ്റില മൊബിലിറ്റി ഹബ്ബിലേക്കുള്ള ഗതാഗതം ദുഷ്കരമായതായി യാത്രക്കാരുടെ പരാതി. വൈറ്റിലയിലെ പ്രധാന ജങ്ഷനിൽ ബസ് ഇറങ്ങിയാൽ 200 മീറ്റർ ദൂരമുണ്ട് ഹബ്ബിലേക്ക്. ഈ റോഡുകൾ ശോച്യാവസ്ഥയിലാണ്. മൊബിലിറ്റി ഹബ്ബിലേക്ക് പ്രവേശിക്കാനും പുറത്തേക്കുപോകാനുമായുള്ള റോഡുകളും മെട്രോ സ്റ്റേഷനിലേക്കുള്ള റോഡുമുൾപ്പെടെ മൂന്നു റോഡുകളാണുള്ളത്.

ഈ റോഡുകളെല്ലാം പലയിടങ്ങളിലും ടൈലുകൾ ഇളകി, നടപ്പാത കാടുമൂടിയനിലയിലാണ്. റോഡിന്റെ പലഭാഗത്തും വെള്ളക്കെട്ടുമുണ്ട്. ചിലയിടങ്ങളിൽ വഴിവിളക്കുകളില്ലാത്തതിനാൽ രാത്രിയാത്ര ദുഷ്‌കരമാണ്. കാടുമൂടിയ ഭാഗങ്ങളിൽ പാമ്പുശല്യവും തെരുവുനായശല്യവുമുണ്ട്. പലപ്പോഴും രാത്രിയാത്രക്കാരെ തെരുവുനായകൾ ഓടിച്ചിടാറുണ്ട്. ഹബ്ബ് അധികൃതർ വേണ്ടവിധം പരിപാലിക്കുന്നില്ലെന്നും ഇതിന് പരിഹാരം കാണണമെന്നും യാത്രക്കാർ ആവശ്യപ്പെട്ടു.