ഓടിക്കൊണ്ടിരുന്ന കാറിന് 
തീപിടിച്ചു

രാമമംഗലം

ഓടിക്കൊണ്ടിരുന്ന കാറിന് തീപിടിച്ചു. മൂവാറ്റുപുഴ, പേഴയ്ക്കാപ്പള്ളി സ്വദേശി പരീതിന്റെ ഉടമസ്ഥതയിലുള്ള കാർ പൂർണമായും കത്തിനശിച്ചു. വ്യാഴം പുലർച്ചെ 4.15 ന് രാമമംഗലം- പാമ്പാക്കുട റോഡിൽ കണ്ടങ്കാവിനും ആശുപത്രിപ്പടിക്കും ഇടയ്ക്കാണ് അപകടം.

സിഎൻജിയിൽ ഓടുന്ന മാരുതി എർട്ടിഗ ടാക്സി കാറാണ് കത്തിനശിച്ചത്. വിവരമറിഞ്ഞ് പിറവം അഗ്നി രക്ഷാനിലയത്തിൽനിന്ന്‌ സ്റ്റേഷൻ ഓഫീസർ എ കെ പ്രഫുലിന്റെ നേതൃത്വത്തിൽ സ്ഥലത്തെത്തിയ സേനാംഗങ്ങൾ തീ പൂർണമായും അണച്ചു.

കാക്കനാട് ഇൻഫോപാർക്കിലെ ജോലിക്കാരുടെ യാത്രയ്ക്കായി ഉപയോഗിക്കുന്നതാണ് കാർ. കാറിൽനിന്ന് പുക ഉയരുന്നത് ശ്രദ്ധയിൽപ്പെട്ട ഉടനെ യാത്രക്കാർ പുറത്തിറങ്ങിയതിനാൽ ആർക്കും പരിക്കില്ല. ഇലക്ട്രിക് ഷോർട്ട് സർക്യൂട്ടാണ്‌ തീപിടിത്തകാരണമെന്ന് കരുതുന്നു.