കുസാറ്റിലെ അനിശ്ചിതകാലസമരം 21–-ാം ദിവസം പിന്നിട്ടു

കളമശേരി

സംഘടനാനേതാക്കളുടെ സസ്പെൻഷൻ അനിശ്ചിതമായി നീട്ടിക്കൊണ്ടുപോകാനാണ് സർവകലാശാല അധികൃതരുടെ നീക്കമെങ്കിൽ സംസ്ഥാനത്തെ മുഴുവൻ സർവകലാശാലകളും കുസാറ്റിൽ കേന്ദ്രീകരിച്ച് സമരം ഏറ്റെടുക്കുമെന്ന് യൂണിവേഴ്സിറ്റി ജീവനക്കാരുടെ സംസ്ഥാന കോൺഫെഡറേഷൻ പ്രസിഡന്റ്‌ ഡോ. പി കെ ബിജു പറഞ്ഞു.

കുസാറ്റിൽ നടക്കുന്ന 21–-ാം ദിവസത്തെ സമരം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സർവകലാശാലകളിലെ അക്കാദമികസമിതികൾപോലും സംഘപരിവാറിന് നൽകി കാവിവൽക്കരണം ത്വരിതപ്പെടുത്തുകയാണ് യുഡിഎഫ് സർക്കാർ. ഇതിനെ ചെറുക്കുന്നതിനാലാണ് അധ്യാപകരെയും വിദ്യാർഥികളെയും ജീവനക്കാരെയും ഇവർ ലക്ഷ്യംവയ്‌ക്കുന്നതെന്നും അദ്ദേഹം പറഞ്ഞു.

അസോസിയേഷൻ പ്രസിഡന്റ്‌ എ ജെ മെറിമോൾ അധ്യക്ഷയായി. സർവകലാശാലാ പെൻഷനേഴ്സ് ഫോറം പ്രസിഡന്റ്‌ പ്രൊഫ. എ ആർ രാജൻ, ജനറൽ സെക്രട്ടറി അഡ്വ. കെ മോഹനചന്ദ്രൻ, എസ് മോഹനദാസ്, ടി പി ജിതിൻ, സി രജിത തുടങ്ങിയവർ സംസാരിച്ചു.