ഗ്രൂപ്പ്‌ പോരിൽ ഭരണം നിലച്ച്‌
 പോത്താനിക്കാട്‌

കവളങ്ങാട്

കോൺഗ്രസ്‌ ഗ്രൂപ്പ്‌ പോരിന്റെ ഇ‍ൗറ്റില്ലമായ പോത്താനിക്കാട്‌ പഞ്ചായത്തിൽ കഴിഞ്ഞ അഞ്ചുവർഷത്തിനിടെ മൂന്നുതവണയാണ്‌ പ്രസിഡന്റിനെയും വൈസ്‌ പ്രസിഡന്റിനെയും മാറ്റിയത്‌. പത്തുവർഷമായി യുഡിഎഫ്‌ ഭരിക്കുന്ന പഞ്ചായത്ത്‌ അതുകൊണ്ടുതന്നെ വികസനകാര്യത്തിൽ ബഹുദൂരം പിന്നിലാണ്‌. പദ്ധതി നിർവഹണത്തിൽ സംസ്ഥാനത്ത് ഏറ്റവും പിന്നിലുള്ള പഞ്ചായത്തുകളിലൊന്നാണ്‌ പോത്താനിക്കാട്.

ലൈഫ് ഭവനപദ്ധതിയിൽ 200ലേറെ കുടുംബങ്ങളുണ്ടെങ്കിലും വീട്‌ നൽകിയത്‌ മുപ്പതോളം കുടുംബങ്ങൾക്ക്‌ മാത്രം. ലൈഫിൽ ഫ്ലാറ്റ് നിർമിക്കാൻ 2018ൽ സ്വകാര്യവ്യക്തി ഒരേക്കർ സൗജന്യമായി വിട്ടുനൽകിയിരുന്നു. ഫ്ലാറ്റ്‌ നിർമിച്ചില്ലെന്ന്‌ മാത്രമല്ല, അതിൽനിന്ന്‌ 13 പേർക്ക് മൂന്ന്‌ സെന്റ് വീതം സ്ഥലം നൽകിയതുപോലും അടുത്തകാലത്ത്‌.

ബഡ്സ് സ്കൂൾ നിർത്തലാക്കിയതിനാൽ ഭിന്നശേഷിക്കാരായ കുട്ടികളുടെ രക്ഷിതാക്കൾക്ക് മറ്റിടങ്ങളെ ആശ്രയിക്കേണ്ട അവസ്ഥയായി. യുവാക്കളുടെ ചിരകാല അഭിലാഷമായിരുന്ന പൊതുകളിസ്ഥലവും കടലാസിൽ തന്നെ. ജില്ലാപഞ്ചായത്ത്‌ അനുവദിച്ച 45 ലക്ഷം രൂപയിൽനിന്ന്‌ 30 ലക്ഷം ചെലവഴിച്ചെങ്കിലും ഇൻഡോർ ബാഡ്‌മിന്റൺ കോർട്ടിന്റെ തറപോലും പൂർത്തിയായില്ല.

​ഗ്രാമീണ റോഡുകൾ എല്ലാം തകർന്നുകിടക്കുന്നു. മഞ്ഞളാംപാറ കുടിവെള്ളപദ്ധതിക്ക് ഫണ്ട് അനുവദിച്ചിട്ടും നിർമാണം പൂർത്തിയായിട്ടില്ല. എസ്‌സി /എസ്‌ടി വിഭാഗങ്ങൾക്കും സ്ത്രീകൾക്കുമുള്ള പ്രത്യേക ഘടകപദ്ധതികൾക്കാവശ്യമായ തുക ചെലവഴിച്ചില്ല. മാലിന്യത്തിൽനിന്ന്‌ വൈദ്യുതി ഉൽപ്പാദിപ്പിക്കുന്ന മാർക്കറ്റിലെ പ്ലാന്റ്‌ അറ്റകുറ്റപ്പണിയില്ലാതെ നാശത്തിലായി.

എംഎൽഎ ഫണ്ട് ഉപയോഗിച്ച് ഏഴുവർഷംമുമ്പ് നിർമിച്ച വില്ലേജ് എക്സറ്റൻഷൻ ഓഫീസ് ഇപ്പോഴും പ്രവർത്തനമാരംഭിച്ചിട്ടില്ല. മാലിന്യ നിർമാർജനപ്രവർത്തനങ്ങളും അവതാളത്തിൽ. പാടശേഖരങ്ങൾ സംരക്ഷിക്കാതെ നെൽക്കർഷകർ കൃഷി ഉപേക്ഷിക്കുന്ന സ്ഥിതിയാണുള്ളത്. കേരഗ്രാമം പദ്ധതി ഉപേക്ഷിക്കപ്പെട്ട അവസ്ഥയിലാണ്.