തിരിച്ചുപിടിക്കണം പോത്താനിക്കാട്‌

കവളങ്ങാട്‌

ഡിവിഷനിൽ ചെലവഴിക്കേണ്ട വികസനഫണ്ട്‌ പുറത്തേക്ക്‌ ഒഴുക്കിയ കഥയാണ്‌ പോത്താനിക്കാട്‌ ജില്ലാപഞ്ചായത്ത്‌ ഡിവിഷനിലെ വോട്ടർമാർക്ക്‌ പറയാനുള്ളത്‌. ചില മേഖലകളിലെ രൂക്ഷമായ കുടിവെള്ളക്ഷാമവും ഗ്രാമീണ റോഡുകൾ പലതും തകർന്നുകിടക്കുന്നതും ഇതിനുദാഹരണം. കഴിഞ്ഞതവണത്തെ വാരപ്പെട്ടി ഡിവിഷനാണ്‌ പേരും രൂപവും മാറി ഇക്കുറി പോത്താനിക്കാടായത്. കോതമംഗലം ബ്ലോക്ക് പഞ്ചായത്തിലെ പൈങ്ങോട്ടൂർ, പോത്താനിക്കാട്, പല്ലാരിമംഗലം, നെല്ലിമറ്റം, വാരപ്പെട്ടി ബ്ലോക്ക്‌ ഡിവിഷനുകളും മൂവാറ്റുപുഴ ബ്ലോക്ക് പഞ്ചായത്തിലെ അഞ്ചൽപ്പെട്ടി ബ്ലോക്ക്‌ ഡിവിഷനും ചേർന്നതാണ് പോത്താനിക്കാട് ഡിവിഷൻ.

ഇക്കുറി പോത്താനിക്കാട് ഡിവിഷൻ തിരിച്ചുപിടിക്കാനുള്ള ഒരുക്കത്തിലാണ് എൽഡിഎഫ്. നിലവിലെ യുഡിഎഫ് അംഗം ഡിവിഷനിൽ ചെലവഴിക്കേണ്ട വികസനഫണ്ടുകൾ മണ്ഡലത്തിന് പുറത്ത് ചെലവഴിച്ചതും ഡിവിഷനിലെ വികസനമുരടിപ്പും വോട്ടർമാർക്കിടയിൽ ചർച്ചയാകുകയാണ്‌.

എൽഡിഎഫ്‌ സ്ഥാനാർഥി ബിനിൽ യൽദോ ബിരുദാനന്തര ബിരുദധാരിയും നിയമ വിദ്യാർഥിയും കേരള വിദ്യാർഥി കോൺഗ്രസ് എം സംസ്ഥാന ജനറൽ സെക്രട്ടറിയുമാണ്‌. വനം, വന്യജീവി പ്രശ്നങ്ങൾ പരിഹരിക്കാൻ ബിനിൽ നടത്തിയ ശ്രമങ്ങൾ ജനശ്രദ്ധ പിടിച്ചുപറ്റിയിരുന്നു. കോട്ടപ്പടി വാവേലി ആലക്കര വീട്ടിൽ പരേതനായ എ സി യൽദോയുടെയും ഷിജിയുടെയും മകനാണ്‌.

യുഡിഎഫ് സ്ഥാനാർഥിയായ ജോമി തെക്കേക്കര കോതമംഗലം ബ്ലോക്ക് പഞ്ചായത്ത്‌ അംഗവും കേരള കോൺഗ്രസ് സംസ്ഥാന ജനറൽ സെക്രട്ടറിയുമാണ്. ബിജെപി കവളങ്ങാട് മണ്ഡലം പ്രസിഡന്റ്‌ അരുൺ നെല്ലിമറ്റമാണ് എൻഡിഎ സ്ഥാനാർഥി.