ട്രെയിൻയാത്രയ്‌ക്കിടെ ബോധമറ്റു;
സുശീലയ്‌ക്ക്‌ പുതുജീവനേകി നഴ്സ് അമിത

ആലുവ: ട്രെയിനിൽ അബോധാവസ്ഥയിലായ യാത്രികയ്ക്ക് രക്ഷകയായി സഹയാത്രികയായ നഴ്സ്. രോഗിയായ ബന്ധുവിനെ സന്ദർശിക്കാൻ തിങ്കൾ രാവിലെ പരശുറാം എക്സ്പ്രസിൽ എറണാകുളത്തേക്ക്‌ പുറപ്പെട്ട കൊല്ലം കരുനാഗപ്പള്ളി സ്വദേശി സുശീലയ്‌ക്ക്‌ ട്രെയിൻ തൃപ്പൂണിത്തുറ സ്റ്റേഷൻ പിന്നിട്ടപ്പോൾ ദേഹാസ്വാസ്ഥ്യം അനുഭവപ്പെട്ടു. ഒപ്പമുണ്ടായിരുന്ന മകളുടെ കരച്ചിൽകേട്ട് തൊട്ടടുത്ത ബോഗിയിൽനിന്നെത്തിയ ആലുവ രാജഗിരി ആശുപത്രിയിലെ കാർഡിയാക് ഐസിയു നഴ്സ് അമിത കുര്യാക്കോസിന്റെ സമയോചിത ഇടപെടലാണ് തുണയായത്.

നാഡീമിടിപ്പ്‌ പരിശോധിച്ചപ്പോൾ ലഭിക്കാതെവന്നതോടെ സുശീലയെ തറയിൽ കിടത്തി അമിത അഞ്ചുതവണ സിപിആർ നൽകി കണ്ണുകളിൽ ചലനവും നാഡീമിടിപ്പും വീണ്ടെടുത്തു. സഹയാത്രികരുടെ സഹായത്തോടെ സുശീലയെ സുരക്ഷിതമായി ഇരുത്തി, കുടിക്കാൻ വെള്ളം നൽകി. ഇതിനകം യാത്രക്കാരിലൊരാൾ ചങ്ങല വലിച്ച് ട്രെയിൻ നിർത്തിയിരുന്നു. ഇതോടെ റെയിൽവേ ജീവനക്കാരും സ്ഥലത്തെത്തി. അമിത കുര്യാക്കോസിന്റെ അവസരോചിത ഇടപെടലിനെ ടിടിഇയും സഹയാത്രികരും അഭിനന്ദിച്ചു. തൊട്ടടുത്ത സ്റ്റേഷനിൽ ഇറങ്ങിയ സുശീലയും മകളും ഡോക്ടറെ കണ്ടശേഷമാണ് നാട്ടിലേക്ക് മടങ്ങിയത്.

മനസ്സാന്നിധ്യം കൈവിടാതെയുള്ള അമിതയുടെ സമയോചിത ഇടപെടലിനെ രാജഗിരി ആശുപത്രി മാനേജ്മെന്റും നഴ്സിങ്‌ ഡയറക്ടർ ഡോ. എലിസബത്ത് ഡേവിഡും അനുമോദിച്ചു. ജീവൻ രക്ഷിച്ച അമിതയെ, വീഡിയോകോളിലൂടെ സുശീല നന്ദിയും അറിയിച്ചു.