മാനദണ്ഡങ്ങൾ അട്ടിമറിച്ച് സ്ഥലംമാറ്റം: എൻജിഒ യൂണിയൻ പ്രതിഷേധിച്ചു ​

കാക്കനാട്

മാനദണ്ഡങ്ങൾ പൂർണമായി ലംഘിച്ച്‌ ജില്ലാ വ്യവസായ കേന്ദ്രത്തിൽനിന്ന്‌ ജീവനക്കാരനെ സ്ഥലംമാറ്റിയതിൽ എൻജിഒ യൂണിയൻ പ്രതിഷേധം സംഘടിപ്പിച്ചു. ഭരണാനുകൂല സംഘടനയിലെ നേതാവിന് ജില്ലാ വ്യവസായ കേന്ദ്രത്തിലേക്ക് വഴിവിട്ട് നിയമനം നൽകുന്നതിനാണ് അടിയന്തര സ്ഥലംമാറ്റമെന്ന് യൂണിയൻ ആരോപിച്ചു.

​ജില്ലാ വ്യവസായ കേന്ദ്രത്തിലെ നിലവിലെ തസ്തികയിൽ പ്രവേശിച്ച്‌ ഒന്നരവർഷംമാത്രം പിന്നിട്ട ജീവനക്കാരനെയാണ് മാറ്റിയത്. അടുത്തിടെ ആൻജിയോപ്ലാസ്റ്റിക്ക് വിധേയനായ ഇദ്ദേഹം ദൂരയാത്ര ചെയ്യാൻ കഴിയാത്തവിധം ആരോഗ്യപ്രശ്നങ്ങൾ നേരിടുന്നുവെന്ന വസ്തുത പരിഗണിക്കാതെയാണ് ഈ നടപടി.

​എൻജിഒ യൂണിയൻ സംഘടിപ്പിച്ച പ്രതിഷേധം സംസ്ഥാന കമ്മിറ്റി അംഗം കെ എ അൻവർ ഉദ്ഘാടനം ചെയ്തു. ഏരിയ സെക്രട്ടറി എ സി ഗിരിജ അധ്യക്ഷയായി. ലിൻസി വർഗീസ്, കെ സി സുനിൽകുമാർ എന്നിവർ സംസാരിച്ചു.