പ്ലസ്‌ടുവിനൊപ്പം നീറ്റും നേടി ലാരിൻ മുഹമ്മദ്‌

മൂവാറ്റുപുഴ

പ്ലസ്ടു പഠനത്തിനൊപ്പം നീറ്റ് പരീക്ഷയ്ക്കും പരിശീലനം നടത്തി ഉന്നതവിജയം നേടി ലാരിൻ മുഹമ്മദ്. അഖിലേന്ത്യാതലത്തിൽ 386–ാം റാങ്ക് നേടിയ ലാരീൻ മുഹമ്മദ്, പായിപ്ര സ്‌കൂള്‍പടി മൂശാരിമോളത്ത് എം എം മുഹമ്മദിന്റെയും (പെരുമ്പാവൂര്‍ ജിഎസ്ടി ഓഫീസ് ഉദ്യോഗസ്ഥൻ) കെ ഇ ഖദീജയുടെയും (പെരുമ്പാവൂര്‍ താലൂക്ക് ആശുപത്രി സ്റ്റാഫ് നഴ്‌സ്) മകളാണ്. ലരീൻ ആദ്യശ്രമത്തിലാണ്‌ വിജയിച്ചത്.

മാന്നാനം കെ ഇ സ്‌കൂളിലായിരുന്നു പ്ലസ്ടു പഠനം. ഇതോടൊപ്പം ഇന്റഗ്രേറ്റഡ് കോച്ചിങ്ങിലൂടെയായിരുന്നു നീറ്റിനുള്ള തയ്യാറെടുപ്പ്. കൃത്യമായ പഠനമാണ് വിജയത്തിന് കാരണമെന്ന് ലരീൻ പറഞ്ഞു. ഇതിനായി നിരവധി മാതൃകാപരീക്ഷകള്‍ എഴുതി പരിശീലിച്ചു. ഈ വര്‍ഷം രണ്ടുവട്ടം പരീക്ഷയ്ക്ക് തയ്യാറെടുത്ത വെല്ലുവിളിയെയും ലരീൻ മറികടന്നു. മെഡിക്കല്‍ മേഖലയാണ് മോഹം. എൻജിനീയറിങ്‌ വിദ്യാര്‍ഥിനി ഹനീൻ, ഒമ്പതാംക്ലാസ് വിദ്യാര്‍ഥി ഹിഷാം, ഏഴാംക്ലാസുകാരന്‍ ഹാതിം എന്നിവരാണ് സഹോദരങ്ങള്‍.